Nunani Avannarlerni Siunnersuisoqatigiit nersornaasiinissaannut uku innersuunneqartut
Nunani Avannarlerni Siunnersuisoqatigiit nunani avannarlerni eqqumiitsuliorneq kulturilerinerlu pillugit nersornaasiinissaannut kalaallit suliaat tallimat immikkoortuni assigiinngitsuni tallimani innersuunneqarput.
Filmi Alanngut Killinganni Nunani Avannarlerni Siunnersuisoqatigiit Filminut nersornaasiuttagaannut innersuunneqartut ilagaat. Filmip innersuunneqarnerata saniatigut kalaallit suliaat allat sisamat aamma innersuunneqarput.
Allattoq Nicole Sander Bertelsen
oktobarip 30-at 2023 12:16
Nutserisoq Connie Fontain
Nunani Avannarlerni Siunnersuisoqatigiinnit nersornaasiinerat nunani avannarlerni eqqumiitsuliornermik kulturilerinermillu qitiutitsisoq Oslomi Operaenimi marlunngorpat aaqqissuunneqassaaq.
Kalaallit suliaat tallimat immikkoortuminni tallimani immikkut innersuunneqarput. NAPA tusagassiuutinut nalunaarummi allappoq.
Innersuunneqartut tassaapput:
- Pikuerniarfik Pikumini avatangiisinut nersornaammik nersornaaserneqarnissamut innersuunneqarpoq.
- Nipilersoqatigiit SIGU, rockimit pop-imut jazzimillu akulerussillutik nipilersortartut Siunnersuisoqatigiit nipilersortartunut nersornaasiuttagaannut innersuunneqarput.
- Pipa Sulullu Qaangiipput Naja Rosing-Asvidimit atuakkiarineqartoq Nunani Avannarlerni Siunnersuisoqatigiit Meeqqanut inuusuttunullu atuakkiortunut nersornaasiuttagaannut innersuunneqarpoq, atuakkami oqaatsitigut aporfeqaraluarluni isummanillu pigiliutiinnagaqartoqaraluartoq ikinngutigiilertoqarsinnaasoq pineqarpoq.
- Filmilianut nersornaasiinissamut filmi ersinartulersaarut Alanngut Killinganni innersuunneqarpoq. Filmi Qaqqat Alanngui-nut 2011-imeersumut nanginneruvoq.
- Atuakkiortunut nersornaasiuttakkamut Qivittuissuit akornanniinnikuuvunga Katrine Rasmussen Kielsenimit atuakkiarineqartoq innersuunneqarpoq. Atuagaq kalaallit upperisaannik tunngaveqartumik pinngortitami illoqarfinnit nunaqarfinniillu takuneqarsinnaanngitsumi inoqarnera pillugu oqaluttuatut takisuutut atuakkiaavoq.
Kalaallimik Nunani Avannarlerni Siunnersuisoqatigiinnit kingullermik 2021-mi kingullermik nersornaasiisoqarpoq, tassanilu Niviaq Korneliussenip atuakkiani Naasuliardarpi pillugu nersornaaserneqarpoq. Ukiut pingasut siuliani tassa 2018-imi Attumi piniartut aalisartullu suliatit pillugit avatangiisinut nersornaammik nersornaaserneqarput.
