Nunatsinni meeravissiartaarineqarsimasut arlallit meeravissiartaarineqarnerminnut suliaq danskit eqqartuussissuserisoqarfianut suliakkiutigaat. Eqqartuussissuerisut nunatsinni angajoqqaat 1960-ikkunni 1970-ikkunnilu Danmarkimi aappariinnut meeravissianngortitsinissaminnut erseqqissumik akuersissuteqarsimanersut misissuleruttorpaat.

Eqqartuussissuserisut suliffeqarfiata danskit naalagaaffiannik suliami ataatsimi imaluunniit arlalinni ukioq manna suliassanngortitsinissaat naatsorsuutaavoq.

Danskit naalagaaffiata taarsiivigineqarnissamut piumasaqaat qisuariarfiginngippagu – imaluunniit itigartippagu meeravissianngortinneqarsimasut naalagaaffimmut eqqartuussivimmut sassaqqusinissartik aalajangersinnaavaat. Eqqartuussivimmut sassaqqusineq eqqartuussivimmi suliap aallartinnissaanut siullertut aqqutigineqartarpoq.

Kalaallit Danmarkimi meeravissiartaarineqarsimasut naalagaaffimmik eqqartuussivilersuussinerat nunatsinniinnaanngitsoq pissangalluni malinnaavigineqarpoq.

Yong Sun Gullach, Adoptionspolitisk Forum i Danmarkip siulittaasua nunanit allanit meeravissiartaartarnerit unitsinneqarnissaat peqatigiiffimmit anguniagaraa:

- Eqqartuussivitsigut suliaq soqutigilluinnarlugu malinnaavigaarput, eqqartuussivilersuussisullu tikilluaqquagut, eqqartuussivilersuussinerminnilu iluatsitsilluarnissaat kissaatigalugu, Yong Sun Gullach oqarpoq.

- Suliaq Danmarkimi nunanit allanit allanit meeravissiartaartarnerit sinnerinut toqqannartumik sunniuteqarsinnaavoq, taakkumi tunngavianni asserluinnaanik ajornartorsiuteqarneq misigisarpaat.

Eqqartuussivimmut sassaqqusisinnaanissamut aqqutissat

Kalaallit 1950-ikkunnit, Namminersornerullutillu Oqartussat 1979-imi eqqunneqarnerissa tungaannut Danmarkimi meeravissiartaarineqarsimasut sinnerlugit eqqartuussissuserisoqatigiit Ehmer Pramming Advokater naalagaaffimmik eqqartuussivilersuussiniarnerunartut KNR-ip siorna decembarimi oqaluttuaraa. Kalaallit Nunaat Danmarkimi nunap ilaattut piffissami qulaani pineqartumi amtiuvoq.

Meeravissiartaarineqartut inuttut pisinnaatitaaffii unioqqutinneqartut eqqartuussissuserisoqatigiit nalilerpaat, meeqqammi angajoqqaaminnit avissaartinneqarlutik, kulturimik annaasaqarlutik, angajoqqaajusullu erseqqissumik akuersiteqqaarnagit Danmarkimi meeravissiartaarineqarput.

Kalaallit Nunaannit meeravissiartaarineqartut, nunaniillu allanit Danmarkimut meeravissiartaarineqartut pillugit suliat arlalitsigut assigiissuteqartut Yong Sun Gullach isumaqarpoq:

- Nunasiaatigineqarsimasutummi allatut taakku aamma pineqarsimapput, soorlu aamma uagut taama pineqarsimasugut. Meeravissiartaarineqarsimasullu inuttut tunngaviusumik pisinnaatitaaffii inioqqutinneqarsimanersut eqqartuussivitsigut suliatigut uppernarsineqarsinnaanera pissanngatigalugu malinnaavigissavarput, Yong Sun Gullach oqarpoq.

Danmarkimi nunanit allanit meeravissiartaarnerit unitsinneqarallartut

Nunanit allanit meeravissiartaarsinnaanerit unitsinniarlugit, meeravissiartaartitaarsinnaanissamut Danmarkimi allattoqarfituap Danish International Adoptionip (DIA-p) qanittukkut nalunaarutigaa.

Allattoqarfiummi taassuma nunat allat arfinillit suleqatigisaannit meeravissiartaartitsisinnaanissaannut akuersissutaat Danmarkimi Naammagittaalliuteqartarfiup Isumaginninnermullu ministereqarfiup atorunnaarsippaat.

Meeravissiartaartitsisarnerni peqquserluttuliortoqarlunilu meeravissiartaartitsiniarnermi erseqqarippaallaanngitsumik tunngaveqarluni meeravissiartaartitsisoqartarsimanera isornartorsiuisoqareersorlu taama pisoqarpoq.

Kalaaleq nunatsinnit Danmarkimi 1970-ikkut qiteqqunneranni meeravissiartaarineqartoq Kâlánguak Absalonsen taakkununnga ilaavoq. DIA-llu meeravissiartaarsinnaanermut unitsitsinera taassuma nuannaarutigaa.

- Danmarkip naalagaaffiata eqqartuussivilersuunneqarnera pissanganartutut isigaara. Uagummi kalaallit meeravissiartaarineqarsimasugut kisiartaanngilagut salluliorfigineqarluta meeravissiartaarineqarsimasut. Meerarpassuit allat salluliornikkut assingusumik pineqarsimapput, kalaaleq Danmarkimi 1970-ikkunni meeravissiartaarineqarsimasoq Kâlánguak Absalonsen KNR-imut oqarpoq.

Oqartussat DIA-mi meeravissiartaarniarnerput unitsitsinerat Norgemi Meeqqanut, Inuusuttunut Ilaqutariinnullu qullersaqarfiup nunanit allanit meeravissiartaarnissamut unitsitsivittoqarnissaanik innersuussuteqarnerani pivoq. Norgemili naalakkersuisut innersuussummut aalajangernissaminnut meeravissiartaarnermut susassaqarfimmik nalunaajaasoqarnissaa utaqqivaat.

Danmarkimi Naammagittaaliuteqartarfiup meeravissiartaarnermut tunngatillugu suliat angjaoqqaarsianngortut meeqqallu atassuteqalersitsineranut tunngasunik suliamik isumaginninneq tiguaa.

Danskit isumaginninnermut ministeriat, Pernille Rosenkrantz-Theilip (S) Amerikap kippasissortaa nunanit allanit meeravissiartaartarnermut apeqqummut tunngatillugu ”upperiatsajasimasoq” oqaatigaa. Taassumali Danmarkip nunanit allanit meeravissiartaarsinnaanerit inerteqqutaalluinnartilissanerai suli aalajangiiffiginianngilaa.