Kalaallit Danmarkimi peqqissartut aalisakkanik tunineqartalissasut

Polar Seafood kalaallit Danmarkimi peqqissartut illuannut kalaaliminernik peqqissartunut nuannarutaasinnaasunik nassiussisalerniarpoq.
Polar Seafood kalaallit Danmarkimi peqqissartut illuannut aalisakkanik akeqanngitsumik tunniussisalissaaq. Assi © : Forsvaret
oktobarip 22-at 2019 16:53
Nutserisoq Connie Fontain

Danmarkimi kalaallit peqqissartut qanigisaasullu kalaalimernertugassaqarnerulissapput. Tassami Polar Seafoodip aalisakkat qaleruallillu peqqissartut illuata igaffianut tunissutiginiarpai, taakku isumaqarput najugaqartunut qiimmatsannartunik peqqinnartunillu nerisassaqartitsinissaq pingaaruteqartoq.

- Tamatta Danmarkimi katsorsarneqartariaqartumik nappaateqalersinnaavugut. Tamannalu artornartuusinnaavoq. tamatumalu saniatigut peqqissartut najugarisartik ungaseqisoq qimaqqasarpaat. Amerlasuutigummi angerlarsimaffik qaammatini amerlasuuni qimaqqaneqartarpoq. Taamaammat kalaallit nioqqutissaataat qiimmatsaataallutillu qujamasunnarsinnaapput, Polar Seafood Greenlandip piginnittua, Jens Salling oqarpoq.

AAMMA ATUARUK Polar Seafood Tunumi misileraalluni saattuarnialerpoq

Kalaallit peqqissartut illuata pisortaata, Birtha Biancop isumaqatigiissut nuannaarutigaa.

- Danmarkimiinnerup angerlarsimaffippalaartinnissaanut iliuuseqarluartarpugut. Nerisassat uani pingaartorujussuupput, taamaammat Polar Seafoodip ingerlaavartumik tunissuteqartarnissaa peqqissartullu nuannaarutigeqaarput, Birtha Bianco oqarpoq.

Nioqqutissat Polar Seafoodip tunniuttaligassaasa annertussusissaat sorliillu peqqissartut illuanni aqutsisut peqqissartunik suleqateqarnikkut aalajangertassagaat Jens Sallingip oqaatigaa.