Polar Seafood Tunumi misileraalluni saattuarnialerpoq

Polar Seafood misileraalluni saattuarniarnissamut 5 millionit koruunit missaannik aningaasaliivoq, Tunumi kangerlunni juulimi aggustimilu misileraalluni saattuarniartoqassalluni.

Norgemiut saattuarniutaat Kvitungen saattuarniarnermut atorneqassaaq, Tunumi saattuanik peqquserutsinillu ujaasilluni misileraalluni aalisartoqassalluni.

Saattuat Kangiani USA-milu tunineqarsinnaalluartut naatsorsuutigineqarpoq, peqquserutsinilli tuniniaasarneq suli ineriartortinneqarsimanani:

- Qanorli soqutigineqartigineri misissorsimavavut, takusinnaallutigulu pisaqarsinnaagutta, ingammik Japan tunitsivissatut periarfissaqartoq, Polar Seafood taama oqarpoq.

Umiarsuaatileqatigiiffiup tamanna pillugu Japanimiunik immikkut ilisimasalinnik Kvitungenimi ilaasoqarnissartik naatsorsorsuutigaa, Japanimi niuerfinnut naleqqussakkanik tamanna pillugu tunisassiorsinnaalernissaq neriuutaalluni.