Kalaallinut filmiliortartunut nutaarsiassatsialaqarpoq: Piviusulersaarutinut tapiissuteqarfigineqarnissamut qinnuteqartoqarsinnaalissasoq
Nunarput pillugu isiginnaagassiat piviusulersaarutit ukiuni kingullerni filmertarfiit ulikkaavitsittarlugillu oqallinnermik pilersitsisarput. Isiginnaagassiat piviusulersaarutit sisamat filmfestivalimi CPH:DOX-imi isiginnaartinneqarput. Maannalu kalaallinut isiginnaagassianik piviusulersaarusiorniartunut nutaarsiassatsialaqarpoq.
Naalagaaffeqatigiinneq pillugu piviusulersaarummik isiginnaagassiornissaq eqqarsaatigigaanni maajip ulluisa pingajuannit aningaasaateqarfimmut qinnuteqartoqarsinnaalissaaq. Danskimmi 2021-mut aningaasanut inatsisaanni naalagaaffeqatigiinneq pillugu ilisimasaqarnerulernissamut siunertaqartumut, NORDDOK II-mut piviusulersaarusianut aningaasaliisartumut 27,1 millionit koruunit immikkoortinneqarnikuupput.
Aningaasaliissutit naalagaaffeqatigiinneq pillugu tv-kkut isiginnaagassianut aningaasaateqarfiup NORDDOK I-ip 2019-imi 10. millionit koruuninik aningaasaliiffigineqartup nanginnerai.
Tamannalu nunatsinni filmiortarnermi pisariaqartilluinnarneqarsimasoq, Film.gl-imi siulittaasoq, Klaus Georg Hansen oqarpoq.
- Danskit aningaasanut inatsisaannit taama aningaasaliineq nunatsinni filmiliortartuni assut nuannaarutigaarput. Nunatsinni filmiliornerup silarsuaanut tapiissuteqarneruvoq kusanartoq, taanna oqarpoq.
Kalaallinut filmiortartunut sinaakkutit pitsaanerusut
Nunarput pillugu piviusulersaarusiarineqartartut danskinit danskillu isiginneriaasiannik tunngaveqarluni amerlanertigut suliaasarnerat, kiisalu Danmarkimi isiginnaartussat eqqarsaatiginerullugit suliaasarnerat nunatsinni ukiuni kingullerni oqallisigineqartarpoq. Isornartorsiuinerlu taanna Klaus Georg Hansen isumaqatigaa. Taassumalu NORDOK II-ip assilissamik allanngortitsinissaa neriuutigaa:
- Kalaallit Nunaat pillugu danskit ukiorpassuarni oqaluttuartuusarput. Tamanna eqqumaffigineqarneruleriartuinnarpoq, tassa danskit nunatsinnik samminnittarnerminni qitiutittagaannut uagut isumaqataajuaannanngilagut. Klaus Georg Hansen oqarpoq.
AAMMA ATUARUK Isinnaagassiaq takuteqqaarneqartoq: Coster-Waldau nunatta inuilaarsuani uumaniartoq
Tamatuma saniatigut Film.gl-imi siulittaasup NORDOK II nunatsinni filmiliornerup silarsuaanut atajuarnerusumik sinaakkusiinermik inerneqarumaartoq neriuutigaa - assersuutigalugu filmiliornermut institutimik pilersitsinikkut, Klaus Georg Hansen oqarpoq:
- Danskit aningaasanut inatsisaannit aningaasaliissutit nunguppata aningaasaliisarneq nunatsinnit nanginneqarnavianngilaq. Tassa ataavartumik aningaasaliinerunngilaq, nunatsinni politikerit eqeerlutik filmiliornerup silarsuaa periarfissatsialattut isigalugu ataavartumik sinaakkusiinngippata. Klaus Georg Hansen taama oqarpoq.
2019-imi suliniutit arfinillit, tassa nunatsinnit pingasut Savalimmiuniillu pingasut NORDDOK I aqqutigalugu aningaasaliiffigineqarput. Piviusulersaarutit ilaat ”Siunissaq – The Last Human” filmfestivalimi CPH:DOX-imi takutinneqaqqammerpoq.
