Isinnaagassiaq takuteqqaarneqartoq: Coster-Waldau nunatta inuilaarsuani uumaniartoq
- Oqaluttuamik Kalaallit Nunaannut tunngasumik suliaqarusullunga sivisuumik isumassarsiorpunga. Uumalu oqaluttuarinissaa soqutiginartittorujussuuara.
Isiginnaartitsisartoq Nikolaj Coster-Waldau KNR-imit angerlarsimaffianut apersoriartoratsigu taama aallartippoq.
Isiginnaagassiaq qallunaat tunup avannaani 1909-mi ilisimasassarsiorlutik angalanerannut "Alabama-ekspedition"-itut ilisimaneqartumut tunngasuuvoq. Sumiiffimmi ilisimasassarsiortut siuliisa Jørgen Brønlundip, Mylius-Erichsenip Høegh-Hagenillu ukiup siuliani ajunaarneranni susoqarsimanersoq paasiniaaffigineqarpoq.
Taakkua Kalaallit Nunaat qeqertaq ataasiusoq uppernarsarniarlugu nunap assinganik suliaqarniarlutik paasisassarsiornerminni ajunaarput.
USA-mmi Kalaallit Nunaat ataasiunani qeqertanut marlunnut avissaaqqanerarlugu tunup avannaa USA-mut atanerarpaa.
"Alabama-ekspedition"-ili pilersaarutaasutut pinngilaq. Ilisimasassarsiortut ittuat Ejnar Mikkelsen, angalaqatigisaalu maskinmesterini Iver Iversen periarfeerunneqarput, inuilaarsuarmilu ullut 865-it, tassa ukiut marluk qaammatillu tallimangajaat, marluinnaallutik uumaniartariaqalerlutik.
Nunatsinneersut immiussinermi ikiuuttut
Against the Ice Ejnar Mikkelsenip atuakkiaa "Farlig Tomandsfærd" aallaavigalugu filmiliaavoq. Ikinngutigiinnermut inuilaarsuarmilu uumaniarnermut tunngasuulluni.
Pisimasoq tunup avannaani pigaluartoq isiginnaagassiaq Ilulissat qanittuanni Islandimilu immiunneqarpoq. Tunup avannaani immiussinissap ajornakusoorpallaarnera tamatumunnga peqquteqarpoq.
Nikolaj Coster-Waldau inuttatut pingaarnertut Ejnar Mikkelseniusaarpoq, tulullu isiginnaartitsisartoq Joe Cole Mikkelsenip angalaqataa Iver Iverseniusaarluni. Assi: Lilja Jonsdottir.
Kalaallit Nunaata pinngortitarsua peqqarniissinnaaqisoq isiginnaagassiami pingaarnertut ersersinniarneqanngilaq.
Isiginnaagassiami kalaallinik inuttaatitaqartoqanngikkaluartoq nunatsinneersut assiliissutip tunuani ikiuupput. Kalaallit isiginnaagassialiortartut siunnersortigineqarput qimussertartullu qimoriarnerit piviusorpalaarnissaannut ilaatigut ikiuutaallutik.
- Ilulissani immiussilluta ulloq taanna aallartikkatta pilluamisaartorujussuuvunga. Polaramamit qimussertartunit ikiorneqaratta iluatsitsisorujussuuvugut. Kalaallit Nunaanni immiussagut immikkuullareqisut kusanartullu tamaasa atorunarpagut.
Dronningimit isumassarsitinneqartut
Ejnar Mikkelsenip Iver Iversenillu Kalaallit Nunaanni ilisimasassarsiorlutik angalanerisa isiginnaagassiarinissaannut isumassarsiaq Nicolaj Coster-Waldauip Peter Flinthillu sivisuumik takorluugarisimagitsik isiginnaartitsisartoq oqaluttuarpoq.
Ejnar Mikkelsenip atuakkiaa Peter Flinthip Nicolaj Coster-Waldauimut ukiorpassuit matuma siorna atuaqqullugu kaammattuutigaa. Isiginnaartitsisartullu oqaluttuaq assut nuanninaarpaa.
Ilisimasassarsiortumut oqaluttuap isiginnaagassianngortinnissaanut piukkunnartoq ataqqinartorsuup Dronning Margrethep aappaata Peter Flinthimut siunnersuutigisimavaa.
Tassalu Dronning Margrethe isiginnaagassiamik piviusunngortitseqataasutut taaneqarsinnaavoq.