Isiginnaagassiortartup piviusulersaarutinik kalaallinit isiginnaagassiarineqartunit festivaalimi takutitsisoqarnissaa amigaatigaa
Filmfestival CPH:DOX nuannarineqarluartoq, nunanit tamalaanit piviusulersaarutinik takutitassaqarluni ippassaq ammarpoq, nunarpullu pillugu isiginnaagassiat sisamat ilaapput.
Nunatta CPH: DOX-imi ukioq manna takutinneqaqqinnissaa nuannerpoq, kisianni piviusulersaarutinik nunatsinniit peqataasoqanngilara akunnakusoorpoq. Nunatsinni isiginnaagassiortarfinni marlunni Anorak filmimi aamma Polarama Greenlandimi isiginnaagassiortartoq piginneqataasorlu, Emile Hertling Péronard isumaqarpoq.
Taassuma isornartorsiuinini isiginnaagassianut piviusulersaarutinut tunnganngitsoq erseqqissaatigaa.
- Nunarput pillugu isiginnaagassiamik takutitsiniaraangamik danskit isaanneersunik takutinneqakkajuppasippoq, Emile Hertling Péronard oqarpoq, nangillunilu:
- Ukiut marluk ingerlaneranni festivaalip piviusulersaarutit marluk nunatsinni pisut ammaanermi takutippai, taakkuli danskinit ilitsersuisunit suliarineqarput. CPH:DOX-ip nunatsinnik soqutiginninnera ersarippoq, kisianni danskit isaanniit allamik periarfissaqartoq immaqa paasisimanngilaa.
AAMMA ATUARUK Kalaallit Nunaat pillugu akiuuneq filmfestivalimi ilaassanngitsoq: Qaamasumik ameqarama, ilitsersuisoq isumaqarpoq
Nammineq isinniit oqaluttualiat
Festivaalimi aammaanermi filmip takutinneqartussap ”Into the ice”-ip ilisimatuut pingasut Sermersuarmi malinnaaffigai. Ukiup kingulliup siuliani piviusulersaarut ”Kampen om Grønland” danskimit ilitsersuisumit Kenneth Sorentomit ilitsersorneqartoq takuteqqaarneqarpoq. Isiginnaagassiaq piviusuinnik tunngaveqartoq oqallinnermik aallartitsivoq. Taanna ilaatigut oqaluttuarisaanermik danskinit isiginnittuuffimmit ilusilersorneqarnera ilaatigut isornartorsiorneqarpoq.
Emile Hertling Péronardip nunarput pillugu isinnaagassianik nunap oqaluttuarisaaneranit allarujussuusinnaasunik ukiorpassuarni suliaqartoqartartoq erseqqissaatigaa.
- Isiginnaagassiaq nunatsinnik sorsuutiginninnermut tunngasoq CPH: DOX-imi ukiut marluk matuma siorna ammaanermi takutinneqarpoq, isiginnaagassiatsialaavoq, kisianni namminersornerulerneq pillugu oqallinneq tamaat ilanngunniarlugu eqqartuiniarnerminni suut tamarmik ilanngussorniarsaraat immaqalu attumassuteqannginnerusut qitiutillugit. Oqaluttuamik uagut oqaluttuartuusuugutta immaqa taanna oqaluttuarissanngikkaluarparput, Emile Hertling Péronard oqarpoq.
CPH: DOX-imi pilersaarusiornermi pisortap, Mads Mikkelsenip CPH:DOX nunatsinnit filminik amerlanerusunik takutitserusulluinnarnerarpaa. Piviusulersaarutinilli nunatsinneersunik nassiussisoqarsimannginnera ajornartorsiutaanerarlugu.
- Danskimit-kalaallimit ilitsersuisartumit, Ivalo Frankimik ukioq manna ataatsimik filmimik nassinneqarpugut, taannalu takutissarvarput. Kalaallinit isiginnaagassianik amerlanerusunik uatsitulli perusunnerusoqanngissoraara, Mads Mikkelsen oqarpoq.
CPH:DOX akisussaaffimmik tigusinerussasoq
Emile Herling Péronardip isiginnaagassianik kalaallinit ilitsersorneqartunik amerlanerusunik filmfestivaalimi takutinneqarsinnaasoqannginnera uggoraa.
- Uagut filminik amerlanerusunik aamma suliaqartariaqarnerput ilusilersornerani soorunami aamma ajornartorsiutaavoq. Kalaallit filmilornissaannut aningaasaqarnerussaaq, taamaalilluta immitsinnit pitsaanerusumik takutitsisinnaassalluta.
AAMMA ATUARUK Festivalip pisortaa kalaallit filmiliaannik siuarsaasutut nalliuttorsiutigineqartoq
Filmiliortartup tamatuma saniatigut CPH:DOX nunatsinnit filmilianik festivaalimut nassiussisoqarnissaanut nammineerluni kalaallit filmiliortartuinut attaveqarluni kaammattuinerunissaa kissaatigaa.
Tamannalu CPH: DOX-ip aappaagumut sulissutiginiarpaa.
- Filminik piorsarsimassutsimeersunit suliarineqarsimasunik isiginnaartitaqarusuppugut, sammisarlu taanna aamm oqallisigingaatsiartarparput, CPH: DOX-imi pilersaarutinut pisortaq Mads Mikkelsen oqarpoq.
CPH:DOX apriilip ulluisa pingajuata tungaanut ingerlanneqassaaq, apriilillu ulluisa aallaqqaataannit qulingata tungaanut isiginnaagassiat piviusulersaarutit assigiinngitsut festivaalip nittartagaatigut isiginnaarneqarsinnaassapput.
