Festivalip pisortaa kalaallit filmiliaannik siuarsaasutut nalliuttorsiutigineqartoq
Kalaallit oqaluttualiaat nunarsuarmi sumiiffinni tamani takussaasariaqarput.
Pipaluk K. Jørgensen ukiuni arlalinni filmilianik nunatsinneersunik allanit aamma takuneqarnissaanik suliaqartartoq taama isumaqarpoq.
Taamalu suliniuteqarnini pissutigalugu Innersuarmik nersornaaserneqarpoq.
Nersornaat taanna filmiliortartut peqatigiiffiata, Film.gl-ip ukiut tamaasa nersornaasiuttagaraa.
Uku Innersuarmik nersornaaserneqarnikuupput
2013: Tumit (Malik Kleist aamma Aka Hansen)
2014: Anorak Film (Inuk Silis Høegh aamma Emile Peronard)
2015-2016: Ulannaq Ingemann
2017: Marius Olsen
2018: Marc Fussing Rosbach
2018: Alanis Obomsawin (æres-Innersuaq)
2019: Aka Hansen
2020: Nivi Pedersen
2021: Pipaluk K. Jørgensen
Paasissutissarsiffik: Film.gl
Film.gl-ip Pipaluk K. Jørgensenip Nuuk International Film Festivalimi pisortaanermini kalaallit filmiliaannik tapersersuinissamik siuarsaanissamillu ukkataqarsimanera ilaatigut tunngavilersuutigaa.
- Pipaluk tamatuma saniatigut isiginnaagassiortarfik Polarama aqqutigalugu kalaallit filmiliortartut filmiliaritittartullu nunami allamiut isiginnaagassiorfiisa nunatsinni immiussineranni pingaarutilinnik inuttalerneqarnissaat qulakkeerniarlugu sulissuteqartarpoq, Film.gl tusagassiuutinut nalunaarummi allappoq.
Filmiliornermi suliaqartartut ilaatinneqartut
Pipaluk K. Jørgensen nersornaaserneqarnini pillugu tusagassiuutinut nalunaarummi ima oqarpoq:
- Nersornaammut qujanarujussuaq. Isiginnaagassiornermi taama nersornaaserneqarnera nuannaarutigaara, pingaartumik ukioq manna Polaramamit nunaqavissorpassuarnik atorfinitsitsinissamik sulissuteqarsimaga.
Innersuaq Nuummi novembarip ulluisa 20-anni tunniunneqarpoq.
Nuummi corona pillugu killilersuisoqarnera pissutigalugu aaqqissuussineq mikisuuvoq, tamannalu Facebookikkut toqqaannartumik aallakaatinneqarluni.
Innersuarmik nersornaat 5.000 koruuninik aningaasartaqarlunilu inuusaliartaqarpoq. Ukioq manna innersuunneqartut pingasuupput.
Innersuarmik 2013-imili nersornaasiisoqartalerpoq.
