Kalaallit Nunaat pillugu akiuuneq filmfestivalimi ilaassanngitsoq: Qaamasumik ameqarama, ilitsersuisoq isumaqarpoq
Filmiliornermi ilitsersuisartup Kenneth Sorentop piviusulersaarluni filmiliani "Kalaallit Nunaat pillugu Akiuunneq", nunanit tamaneersut akornanni assut takutikkusukkaluarpaa.
Tamannali ajornaqaaq. Namminerlu isumaa naapertorlugu, tamanna qaamasumik ameqarneranik pissuteqarpoq.
- Filmiliara takutinneqarusunngilaq uanga qaamasumik ameqarama, Kenneth Sorento KNRimut oqarpoq.
Tassuma ukiut qulingiluat filmiliorluni atornikuuai, filmilu Nunatsinni Danmarkimilu isiginnaartunit iluarusuutigineqarnikuuvoq.
Isiginnaartartulli nunanit tamaneersut filmip nalilernissaanut periarfissaqanngikkallarput.
Tamanna uggornaqaaq, ilitsersuisoq oqarpoq, isumaqarlunilu sapaatit akunnerini kingullerni nunarsuatsinni Black Lives Matter, Hans Egede namminersulivinnissarlu oqallisaareeqisut, Kalaallit Nunaanni ullumikkut pissutsit siaruaanneqarsinnaangaluarmata.
- Filmi Kalaallit Nunaannut tunngasuungaluartoq, nunarsuatsinni oqallisaasunut ilanngullugu oqallisaasinnaangaluarmat – qaqugukkut ilumoortumik amerikamiuuneq, qaqugukkut ilumoortumik danskiuneq, qaqugukkut ilumoortumik kalaaliuneq, taanna oqarpoq.
Canadami itigartitaavoq
Canadami filmfestivaleqarpoq ImagineNative Film Festivalimik taaguutilimmik. Tassani filmi ”Kalaallit Nunaat pillugu Akiuunneq” takutikkusunneqanngilaq, tassani filminut takutinneqartunut ilitsersuisut nunap inoqqaavinut ilaanissaat piumasaqaataammat.
- Tapiinissatsinnut piumasaqaatit nutaat naapertorlugit, uagut festivalernitsinni filmit takutinneqartut nunap inoqqaavisa ilaannik ilitsersuisoqartussaapput, takutinneqartussanik ataqatigiissaarisoq, Judith Kanatahawi Schuyler, nalunaarpoq, Jyllands-Posten naapertorlugu.
Kenneth Sorento isumaqaraluarpoq, piumasaqaatit naammassinikuullugit, nammineq filmiliornermini ilitsersuisut filmiliornermillu ingerlatsitut kalaallit suleqatiginikuugamigit:
- Isumaqarpunga tamanna naapertuilluaanerunngitsoq, filmiliornermimi ingerlatsisoqatiga Jørgen Chemnitz kiisalu ilitsersuisooqatiga Malik Kleist kalaaliummata qanimut suleqatiginikuusaka, taanna oqarpoq, nangillunilu:
- Ukiut qulingiluat filmiliorninni atornikuuakka kiisalu inuit ilikkarnissaannut inuiaqatigiillu paasisaqarfiginiarnissaannut piffissaqarusullunga, sivisuumik Nuummiitarnikuullunga. Kalaalerpassuit filmi nuannaralugu oqarfigisarpaannga, kalaallillu inissisimaneranniit oqaluttuartutut misigisarnerarlugu. Taamaammat qaamasumik ameqarnera pissutigiinnarlugu filmip takutinneqarusunnginnera naapertuilluannginnertut isigaara.
Siunissami pissusaalertussaq
”Kalaallit Nunaat pillugu Akiuunneq” ImaginaNative Film Festivalip kisimi takutikkusunngilaa.
Torontomi aamma filmfestivalimi, Hot Docs-imi, filmip takutinnissaanut Kenneth Sorento itigartinneqarnikuuvoq. Taakkua suna pissutiginerlugu nalunaaruteqanngillat. Aamma New York Tribeca Film Festivali itigartitsivoq, suna pissutiginerlugu nalunaaratik.
Nunarsuatsinni filmfestivalit annersaanni Amsterdamimi ingerlanneqartartumi, IDFA: The International Documentary Film Festival Amsterdamimi, aamma itigartinneqarnissani, Kenneth Sorentop naatsorsuutigaa.
- Tamatumunnga pissutigaara, takutinneqartussanut aaqqissuisut pisortaat kiisalu eqqumiitsuliornikkut siuttuat, angutit qaamasumik amillit nunat inioqqaavi pillugit oqaluttuarliortartut assut akerleralugit ersarissumik oqarnikuunerat, Kenneth Sorento oqarpoq.
Taassuma naatsorsuutigaa, siunissami qaamasumik amillit nunat inoqqaavi pillugit oqaluttuarniaraangamik, filmfestivalinit arlalinnit itigartinneqartalissasut:
- Nunarsuatsinni tamanna pissusaaleriartuaartoq takusinnaavarput, taanna isumaqarpoq.
- Qujanartumilli maani nunani avannarlerni filmi takutinneqartassaaq.
