Tarrak Roskildemi: Kalaallinik isiginninnerloqaat kisianni angusaqarluarpugut

Ukioq manna Roskildemi appittussat qimerloorukkit kalaallip nipilersortartup aqqa akornaniittoq maluginiagassaavoq: Tarrak.

Festivalip ulluini siullerni First Daysinik taasagaanni appittussanut ilaavoq rappertartoq 24-nik ukiulik. Tusaamaneqaleriartortut sceneni minnerni ulluni siullerni tusarnaariarneqarsinnaapput.

– Inuit qisuariarnissaat pissangageqaaraa kalaallisummi rappertussaavunga, Tarrak oqarpoq. Taanna Josef Tarrak-Petrussenimik ateqarpoq.

– Nipilersornerup nuannequtigaa oqaatsit atorneqartut apeqqutaatinnagit misigissutsit nipilersornikkut pilersinneqartarmata, Tarrak oqarpoq.

Danskit tusaamasat soorlu Jada, Mø, Tessa aamma The Minds of 99 scenemi Tarraap appiffissaani tusarnaariat amerlasuut siullermeerlutik appiffigaat.  

Taamaammat Tarraap tusarnaartitsinissaa tusaamasanngornerulernissaanut aqqutissiuisinnaavoq.

Imminut upperisoq

Nunani avannarlerni festivalit annertunersaanni appinnissani ilimagisimanagu oqarusunngilaq, kisianni qamuuna nalunngittuarsimallugu oqarpoq:

- Imminut upperisariaqarputit niaqulaartutulluunniit ingasatsigisumik. Ilaanni imminut upperivallaangajattarpunga, Tarrak oqarpoq.

Tusarnaartitsinissami Kalaallit nipilersugaannut iluaqutaanissaa Tarraap neriuutigaa, Taannami isumaqarpoq pikkorissunik nassaarisariaannarnik nersortarialinnillu arlalinnik maani nipilersortartoqartoq.

Amerlasuut Kalaallit nipilersugaannik nuannarisaqarnerat nammineerluni misigisimavaa, kisianni ajornartorsiuteqarpoq:

Assi © : Scanpix

Kalaallit nipilersortartut Danmarkimi tusarnaartitsinissaminnut periarfissakinnerusut Tarrak isumaqarpoq. Aaqqissuussani kalaallinut tunngatitani nipilersornerusarnerarpai, assersuutigalugu Tivoli Kalaallinut ulloqartitsigaangat.

- Roskilde Festivalimut pilersaarut takugakku torrageqaara, nipilersortartut danskerpassuit akornanni Tarrak ilaariataartoq. Kalaaliunera pinagu eqqumiitsuliortuunerali pillgu, taanna oqarpoq.

Kikkulluunniit nipilersornermit ilikkagaqarsinnaasut

Tarrak Nunatsinni tusaamaneqareerpoq, neriupporli kalaallit rappertarnerannik festivalimi tusarnaarianut uisitsiumaarluni.

Inuit ilaat isumaqarput kalaallit tassaasut taakku qimuttuitsut unittarfiini imerusaartartut. Danskit takujuagaannik allaanerusoqarnera tusarnaariat takujumaarpaat. Kalaallit pillugit isummiuteriikkanit allaanerusoqarnera piunerinnarmaluunniit uppernarsarpaa, taanna oqarpoq.

Kalaallinik nukittuunik tusarnermikkut danskit imminut isiginertik pillugu eqqarsarluarnerunissaat taassuma neriuutigaa.

- Nunasiaataanitta nalaani pisut pillugit Danskit ilisimasakeqaat. Danskit naluaat uagulli kalaallit nalunngilagut. Danskit inuiaqatigiit ineriartornerat inuiaqatigiinnik allanik pilliuteqarnikkut pisoq Danskit paasisariaqalerpaat, oqarpoq nangillunilu.

-Kalaallinik isiginninnerloqaat kisianni angusaqarluarpugut.

Kisianni Danskit kalaallinik paasinninnerat kisimi allanngortitassaanngilaq. Kalaallit imminut isiginerat aamma allanngortitassaavoq.

- Nuanneruloortumeersuuvugut, siulivut maani aniguipput sulilu kalaallisut oqalussinnaalluta. Tamannalu tulluusimaarutissaraarput, taanna oqarpoq.

Roskilde Festivali juunip 24-ani aallartissaaq juulillu aallaqqaataata tungaanut ingerlassalluni.