Juncker tulunnut: Kinguartitsinerit tassa

Jean-Claude Juncker naapertorlugu brexitip kinguaattooqqinnissaanut “tunngavilersuutissaqanngilaq”.
EU-mi qullersat Bruxellesimi sisamanngornermi tallimanngornermilu ataatsimiipput. Pilersaarutit maannakkut piusut malillugit Brexit taamaallaat sisamanngornermi oqallisigineqassaaq. Assi © : Francois Lenoir/Reuters/Ritzau Scanpix
Allattoq Ritzau
oktobarip 18-at 2019 07:16
Nutserisoq Connie Fontain

Underhusimut ilaasortat EU-mit aninissamut isumaqatigiissut EU-p tuluillu ministeriunerata Boris Johnsonip isumaqatigiissutigisaat naammaginngikkunikku Tuluit Nunaata brexit kinguarteqqinnavianngilaa.

EU-Kommissionip siulittaasua, Jean-Claude Juncker, Bruxellesimi EU-mi naalagaaffiit naalakkersuisullu siuttuisa ataatsimiinneranni taama nalunaaruteqarpoq.

- Isumaqatigiissuteqarpugut, tassalu kinguartitseqqinnissamik pisariaqartitsisoqartariaqanngilaq, Jean-Claude Juncker oqarpoq.

- Kinguartitseqqittoqarnavianngilaq. Allanik tunngavilersuutissaqanngilaq. Brexit maannakkut pisariaqarpoq.

EU-mi qullersat Bruxellesimi sisamanngornermi tallimanngornermilu ataatsimiipput. Pilersaarutit maannakkut piusut malillugit Brexit taamaallaat sisamanngornermi oqallisigineqassaaq.

Underhusip avissaarnissamut isumaqatigiissut arfininngorpat taasissutigissavaa.

Underhusimi ilaasortat sisamariaannarlutik arfininngornermi ataatsimiittareerput. Falklandip Qeqertaani 1982-imi sorsunnermi kingullermik arfininngornermi ataatsimiipput.

AAMMA ATUARUK Boris Johnson: Vi har landet en aftale om brexit

- Isumaqatigiissuteqarsinnaanerput ilorrisimaarutigaara, Tuluit Nunaatali EU-mit anilernera ajuusaarutigaara, Juncker oqarpoq, nangillunilu oqarluni Boris Johnson kinguartitseqqinnginnissamut isumaqataasoq.

Tuluit Nunaat marsip ulluisa 29-annili anisussaagaluarpoq, tuluilli aninissamut isumaqatigiissuteqaratik aninnginnissaat pillugu kinguartitsinissaq illuatungeriinnit isumaqatigiissutigineqarpoq.

Taamani ministeriunerup, Theresa Mayip, isumaqatigiissut Londonimi Underhusimi amerlanerussuteqartunit akuersissutigitissinnaanngilaa.

AAMMA ATUARUK Theresa May tunuartoq

Boris Johnsonilu taarsikkaminit iluatsitsinerusinnaassanersoq maanna apeqqutaaginnalerpoq.

Isumaqatigiissut nutaaq naalakkersuisut Nordlandimit tapersersortaannit, DUP-imit, Liberaldemokraatinit, Labourimit kiisalu Skotlandimi partiimit SNP-mit akerlerineqalereerpoq.

            /ritzau/