Julie aamma Mø Akisuanerit Festivalimi peqataalersut
Karen Marie Aagaard Ørsted, aamma MØ-mik ilisimaneqarluartoq, festivalernissarsuarmut peqataasussanngorpoq.
MØ nunat assigiinngitsut akornanni soorlu USA-mi, Tuluit Nunaanni, aammalu Europami alutorisaanerpaanut ilaavoq, taannalu nunatsinni siullerpaamik tusarnaartitsisussanngorpoq. Tamanna Akisuanerit Festivalimi aaqqissuisup qilanaarutissaalluarnerarpaa.
AAMMA ATUARUK Julie Ninalu Melodi Grand Priximi peqataalersut
- MØ allaalaarami allaninngaaniit, scenemi pilukattorujussuullunilu naalanngilluni Kalaallit Nunaanni nipilersoriaaseq taanna suli mutiuallaannginnami, pikkunassamaaqaaq, taama oqarpoq Akisuanerit Festivalimi aaqqissuisoq Christian K. Elsner
MØ-li kisimi Akisuanerit Festivalimi tusarnaartitsissanngilaq.
Tassami ilisimalluagarput, Julie Berthelsen, Akisuanerit Festivalimi aamma tusarnaartitsisussanngorpoq.
Julie Berthelsenip nalliuttorsiornera aamma malunnartinniarneqarpoq.
AAMMA ATUARUK Akisuanerit Festival ukiunik qulinngortorsiulersoq
- Julie ukiut 15-inngortorsiortoq aamma malugineqarniassagami, taamaattumik aamma qilanaaqaagut ilaalerami, Christian K. Elsner oqarpoq.
Nipilersortartut nunatsinneersut marluk festivalernissarsuarmi aamma peqataasussaapput, tassaallutik Ulf Fleischer aamma Enok Poulsen.
- Ulf Fleisher come backernikuuvoq ilaatikkatsigi 2014-mi, taavalu festivalitsinni ilaaqinnikuunnginnami ukioq manna aperigatsigu qujanartumik angerpoq. Enok Poulsen aatsaavissuaq ilaalerpoq, tulluartipparput aamma, taama naggasiivoq Akisuanerit Festivalimi aaqqissuisoq Christian K. Elsner.
Akisuanerit Festival ukiamut oktobarip ulluisa sisamaannit, arfernata tungaanut ingerlanneqassaaq.