Akisuanerit Festival ukiunik qulinngortorsiulersoq
D-A-D-kkut kingullermik ukiut qulit matuma siorna nunatsinniipput. Dizzy Mizz Lizzykkullu ukiut pingasut matuma siorna Nuummimmata, Akisuanerit Festivalimi aatsaat taama nipigitsigisumik takutitsilluarfiutigisumillu tusarnaartitsisoqartoq aaqqissuisumit Atlantic Musicimeersoq, Christian Elsner isumaqarpoq.
Akisuanerit Festivalimili rockimit allaanerusunik aamma nipilersortoqassaaq. Aammami tusaamasaq Rasmus Lyberth nipilersortartunilu tusarnaartitsissapput. Rasmus Lyberth ukiut qulit matuma siorna siullerpaamik Akisuanerit Festivalertoqarnerani peqataavoq.
Aamma Nuummeersut metalimik nipilersortartut Sound of the Damned, D-A-D-mut Dizzy Mizz Lizzymullu kissassaallutik appisimaassapput.
Tusarnaartitsisussat ilaneqarumaartut aaqqissuisut neriorsuutigaat. Akisuanerit Festivalip facebookkikkut quppernerani malinnaasoqarsinnaavoq.
Festivalimut bilitsit juunip aallaqqaataani tuniniarneqalissapput, Katuamilu ulluni pingasuni septembarip ulluisa 28-annit 30-ata tungaanut festivalertoqassaaq.
