Josef Motzfeldt: Pisussaaffittut isigisariaqarparput
Nunatta sineriaanik aalisartunillu nakkutilliinerit Danmarkip illersornissamut ministereqarfianit isumagineqartarput, tamannali nunatta nammineq isumagisinnaalluaraa, nunanut allanut naalakkersuisoq Josef Motzfeldt isumaqarpoq.
Dansk Folkepartii sinnerlugu Folketingimi ilaasortap, Søren Espersenip, Savalimmiuni Kalaallit Nunaannilu sakkutuujusussaatitaanerup eqqunneqarnissaa siunnersuutigaa.
Danmarkimi sakkutuussarsiornermut iluaqutaassammat Søren Espersen taamatut siunnersuuteqarpoq.
Nunanut allanut tunngasunut naalakkersuisup Josef Motzfeldtip siunnersuutip piviusunngortinneqaratarsinnaanera piareersimaffigaa, oqarlunilu nunap illersorneqarnissaa killeqarfiillu nakkutigineqarnissaat inuiattut pisussaaffittut isigisariaqarivut, taamatut isiginnittaaseqarnissarput sakkutuujunermut taarsiunneqarsinnaasoq Josef Motzfeldtip aamma oqaatigaa:
- Qimussernermik ingerlatsinissamut ajukkunnaateqanngilagut, aamma imarsiornermik inuttaanissamut pisussaaffittut isigineqalerpat qularnanngilaq aamma taanna sapeqqajarnavianngilarput, Josef Motzfeldt oqarpoq, nangillunilu:
- Inatsisartut apeqqutaassapput. Inatsisinngorpat inuusuttut piareersarneqarnissaat tullinnguutissaaq. Pingaarneruvoq inuusuttut assigiimmik pisussaaffeqartutut misigisimalerunik, Josef Motzfeldt naggasiivoq.
