Johannes Petersen Ujarassiorimmi ajugaangajattoq

Nuna tamakkerlugu nuannariinnarlugu ujarassiortut ujaqqanik nassaaminnik unammisitsinermut Ujarassiorimmut ukiut tamaasa nassiussisinnaasarput.

2023-mi misissugassat 571-it nassiunneqarput, taakkunanngalu 106-it aatsitassannguussimasunik takussutissartaqartut misissoqqissaarneqarput.

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik tusagassiuutinut nalunaarummi allappoq.

Nassiunneqartunit 500-it sinneqartunit arfineq-pingasut ajugaasuupput, taakkulu tamarmik assigiinngitsunik naleqartunik katillugit 120.000 koruuninik akissarsitinneqarput. Akissarsiat ippassaq agguaanneqarput.

Peter Alaufesen Attumeersoq siullertut ajugaasuuvoq, taanna 55.000 koruuninik akileraarutitaqanngitsunik akissarsitinneqarpoq.

Taanna brecciamik aasumik manngertornisimasumik Aqisserniap kujataani nassaaminik nassiussivoq. Misissueqqissaarnermi taanna aatsitassanik qaqutigoortunik soorlu ceriumimik, strontiumimik, lanthanimik aamma neodymimik qaffasissumik akoqartoq paasineqarpoq.

Saffiugassat taaneqartut teknologiimik tunisassiornermut aammalu ataavartumik nukissiornermi pisariaqartuupput.

Ajugaasut aappaat, pingajuat sisamaallu

Johannes Petersen Arsummeersoq ajugaasup aapparaa, taassuma pegmatit aqerlussartalik nassaarisimasani 25.000 koruuninik akissarsissutigaa.

Nassiunneqartup misissoqqissaarneqarnerani saffiugassanik soorlu zinkinik saviminiliornermut quleriaammik attartussuseqalertitsisartumik pingaaruteqartunik akoqartoq paasineqarpoq.

Pingajuattut ajugaasut marluupput, taakku immikkut 10.000 koruuninik akileraarutitaqanngitsumik akissarsitinneqarput. Torsteen Overgaard Nuummeersoq grafiti manngertoq Uummannami Ikerasaap eqqaani nassaani ajugaassutigaa. Frederik Fenckerillu Nuummeersup Nuummiti (pinnersaasiassaq) ajugaassutigalugu.

Sisamaattut ajugaasut sisamaapput, taakku immikkut 5.000 koruuninik akissarsitinneqarput. Taakku tassaapput Hans Petersen Ukkuissaneersoq, Patdloq Hendriksen Siorapalummeersoq, Simmi Frederiksen Ilulissaneersoq kiisalu Elisabeth L. Jensen Nuummeersoq.

Ujarassiorit 1989-imi ukiut tamaasa ingerlanneqartarpoq, tassanilu innuttaasut peqataatinneqarlutik saffiugassanik nutaanik nassaarsiortoqartarluni.

Nasisunneqartut arlallit kingunerisaanik nunatsinni aatsitassarsiornisssamik misissuinerit aallartinneqarnikuupput.