Ujarassiornermik soqutigisallit ujaqqanik immikkuullarissorsiorlutik ukiuni 35-ni unammisareersut
Ujarassiorit 2023-mi ajugaasoq ullumi nalunaarutigineqassaaq.
Nunatsinni ujarassiornermik soqutigisallit ujarattaannik misissuilluni unammisitsisarneq 1989-imili ileqquulermat ujaqqat 30.000-ingajaat nassiunneqarsimapput.
Qaqqanilu ujaqqanik immikkuullarissussarsiorlutik alapernaatsut suli amerlapput.
Ujarassiornermik soqutigisallit ujaqqat misissugassat nunatsinni tamaneersut ukioq manna unammisitsinermut nassiussaat 571-iupput. Ujarassiortitsisarnerli peruttulermat ujaqqat misissugassat nassiunneqartartut amerlanerulluartarput.
- Ujarassiorit 90-ikkut aallartinneranni 2000-ikkullu aallartilaarnerata nalaani soqutigineqarluarpoq, misissugassallu ukiumut 1.000-it sinnerlugit nassiunneqartarput. Corona aamma sumiiffiit qaqqamit sisoorfiusinnaasut eqqartorneqangaatsiarnerat peqqutigigunarlugit peqataasartut ukiuni kingullerni ikinnerusarput, aatsitassanut naalakkersuisoqarfimmi ujarassiooq, Pele Tobiasen oqarpoq.
Malu Ravn Qaqortumeersoq siorna unammisitsinermi ajugaagami akileraarusigaanngitsunik 55.000 koruuninnappoq. Taassuma ujarattaa Qaqortukuluup Tasiusaata Qinnguata kuuata eqqaani innermik anitsinermeersuuvoq.
Ujarattaa taanna qaarsuimmeersuusoq atortussiassaasartunik lithiumimik, berylliumimik, manganimik yttriumimillu akoqarpoq. Atortussiassaasartuni pissarsiariuminaatsut nukissiuutini minguitsuni, qarasaasiani, mobilini, batteriini, biilit atortuini allarpassuarnilu atorneqartarput.
Sunaana neqimineq?
Naak ujaqqat pinnersaasiassat kusanartorpassuit nunatsinni nassaarineqarsinnaagaluartut, taamaattoq ujaqqat takuinnarlugit kusanarnerpaanngikkaluartut ajugaassutigineqarnerusarput.
Ujaqqalli akui misissussallugit soqutiginarnerukkajuppoq.
Ujarak 2022-mi ajugaassutigineqartoq assersuutissatsialaavoq.
- Ataatagalu marluinnaalluta angalaarluta querusunnermik quissallunga unikkama, siulliulaartoq ataataga taava quissallunga sanimut qiviarama... Una sunaana neqersuasik, neqitut isikkoqarami, Malu Ravn ajugaanermi kingorna KNR-imut oqarpoq.
Pele Tobiasenip oqarnera naapertorlugu ujarak misissugassaq pitsaasoq tassaasarpoq nunatsinni ujarassiornermi nutaanik ilisimasaqarnerulersitsisoq.
- Ujaqqap nassaarineqarfigisaani nutaanik ilisimasaqalertarnerput isumaqartorujussuusarpoq. Misissorneqartut saffiugassiassartaqarnersut pinnersaasiassaqqinnersulluunniit apeqqutaanngilaq. Ujaqqat nassaarfiusimasunit nalunngeriikkatsinneersut misissussallugit soqutiginngilarput. Imaassinnaavormi aatsitassarsiorfioreersumeersuusut, taanna oqarpoq.
Ujaqqap sumi nassaajusimanera qulakkeerniarlugu misissukkap qaarsuimmeersuunera apeqqutaatinneqartartoq Pele Tobiasen aamma oqarpoq.
Akissarsiassaq ujarassiornermik soqutiginnilersitsissasoq
Ujarassiorimmi ajugaasunut aningaasat agguaallugit akissarsiaritinneqartussat katillugit 120.000 koruuniussapput.
Grønlandsbankenip Inuussutissarsiornermut Aningaasaateqarfia 40.000 koruuninik aningaasaliivoq, suliffeqarfillu Greenfields Exploration 10.000 koruuninik tapiissuteqarluni.
Akissarsiassagissaarneq amerlasuut ujaqqanik misissugassanik nassiussisarnissaannut kajumissaataassasoq Pele Tobiasen nassuiaavoq. Tassami Ujarassiorit suleqatigalugu kalaallit innuttaasut ujarassiornermik soqutigisaqarnerulernissaat nunatsinnilu aatsitassanik misissuinerup siuarsarneranut iluaqutaanissaa neriuutigineqarpoq.
- Ujarassiorneq pingaaruteqarpoq, atortussiassammi ullutsinni nutaaliaasumi inuuniarnitsinnut tunngaviliisut sumi nassaarisinnaanerigut ujarassiornikkut paasisarparput. Pinngoqqaatit assigiinngitsorpassuit, soorlu mobilini nutaaliani smartphonesini atorfissaqartitagut, Pele Tobiasen oqarpoq.
Ujarassiorit 2023-mi kina ajugaanersoq aatsitassanut naalakkersuisup Naaja H. Nathanielsenip nalunaarutigissavaa, ullumilu nal. pingasut sisamallu akornanni pissaaq.
