Qaqortormiup Malu Ravnip asimi aqunngatilluni nassaani Ujarassiorit 2022-mi ajugaassutigigaa
Qaqortormiu Malu Ravn akileraarusigaanngitsunik 55.000 koruuninnappoq.
Taannami aliikkutaralugu ujarassiortartunut siorna unammisitsinermi, tassa Ujarassiorit 2022-mi, ajugaavoq. Ujarattat misissugassatut Namminersorlutik Oqartussat siorna unammisitsinerannut nassiussat 248-pput.
Taakkunannga 28-t atortussiassaasartumik savimineqartut erserpoq, ujaqqallu taakku 28-t ujarassiortitsinermi naliliisartut misissoreersimalerpaat. Tassalu Qaqortormiu Malu Ravn Ujarassiorit 2022-mi ajugaasutut 55.000 koruuninik akissarsitinneqassasoq, ujarassiortitsinermi naliliisartut isumaqatigiipput.
Ujarak neqiminingasoq
Malu Ravnip ujarattaa Qaqortukuluup Tasiusaata Qinnguata kuuata eqqaani innermik anitsinermeersuuvoq.
Ujarattaa taanna qaarsuimmeersuusoq atortussiassaasartunik lithiumimik, berylliumimik, manganimik yttriumimillu akoqarpoq. Atortussiassaasartut taakku tamarmik atortussiassaasartuni pissarsiariuminaatsutut EU-mi nalunaarsoqqapput. Taamaammallu Malu Ravnip ujarattaa soqutiginaateqartoq, tusagassiorfinnut nalunaarummi allaqqavoq.
Atortussiassaasartuni pissarsiariuminaatsut nukissiuutini minguitsuni, qarasaasiani, mobilini, batteriini, biilini atortunilu allarpassuarni atorneqartarput.
- Ujarak taanna atortussiassaasartumik lithiumimik akoqaluarmat nassaartua ajugaavoq. Ukioq manna unammisitsinermut nassiussat atortussiassaasartunik nukissiuutini minguitsuni atorneqartartunik akoqarluarnissaat pingaartissimavarput, ujarassiooq unammisitsinermilu nalileeqataasoq Pele Tobiassen KNR-imut oqarpoq.
Malu Ravn piniartuullunilu aalisartuuvoq, taassumalu ujarattani ataatanilu asimiitillutik nassaaraa.
- Tassa ataatagalu marluinnaalluta angalaarluta querusunnermik quissallunga unikkama, siulliulaartoq ataataga taava quissallunga sanimut qiviarama... Una sunaana neqersuasik, neqitut isikkoqarami, taanna KNR-imut oqarpoq.
- Mikisuullungali ujaqqat soqutigivakka, ataataga ujaqqanik iikkanut nippussuinikuuvoq, katersiinnavinnikuuvunga inuunera tamaat.
Malu Ravnip ujarattani unammisitsisunut nassiummagu ajugaanissi naatsorsuutigisimanngilaa. Kisianni:
- Tupannaqaaq. Aapparma suliffianiitsillunga sianerfigitikkama, nilliarpiaasaannangajak oqaluppunga tupannermik. Oorertai eqqarsaatiginagit ajugaanera kisimi taanna, taanna oqarpoq.
Ajugaasup tulliatut akileraarusigaanngitsunik 25.000 koruuninnattoq tassaavoq, Lisbeth Bianco. Taanna aamma Qaqortormiuuvoq.
Ajugaasup tulliata tullii marluk tassaapput: Upernavimmiu Jens Grim aamma Kullorsuarmiu Paulus Isak Danielsen. Taakku akileraarusigaanngitsunik tamarmik immikkut 10.000 koruuninnapput.
Ujarassiorimik taallugu 1989-imi unammisitsisoqaqqaarpoq. Tassa inuit atortussiassaasinnaasoqarfiusinnaasuni ujarattartaleqqullugit ujarassiortitsisoqartalerpoq.
Ujarattammi misissugassatut nassiussat ilaat, aatsitassarsiutileqatigiiffiit aatsitassaqarfiusinnaasuni misissuinerannik allaat kinguneqartarput.
Saffiugassarsiuut Aatsitassanut Naalakkersuisoqarfimmeersut aamma Danmarkimi nunatsinnilu nunap qanoq issusianik misissuisarfik De Nationale Geologiske Undersøgelser for Danmark og Grønlandimeersut (GEUS) Ujarassiorit 2022-mi naliliisuupput.
