Ukioq manna ujarassiorimmi ajugaasoq: Tuttunniarnermini ujaqqamik soqutiginartumik nassaartoq
Ukioq manna ujarassiorimmi ajugaasoq aatsitassanut naalakkersuisumit, Jens Frederik Nielsenimit (D) toqqarneqarpoq.
Ujarassiorit nuna tamakkerlugu ujarassiornermik soqutigisalinnut tamanut ukiut tamaasa unammisitsineruvoq. Taanna 1989-imili ukiut tamaasa ingerlanneqartarpoq.
Suulooraq Jessen Kangaamiuneersoq ukioq manna ajugaasuuvoq.
Billede: Privatfoto, Suulooraq Jessen.
Taassuma ujarak alutorisimasani tuttunniarnermini nassaaraa.
- Aqqutikora atuarnagu pisaqarnikuullunga ammukarlunga, nammaarlunga tuttutannik. Taava ungasinngisanni ujarak allagalugu qanilligakku, taanna sunaaffa ujarak. Ilanngarsiffiniaraluarakku alutoralugu. Kisianni manngernermik ilanngarsiffigisinnaannginnakku.
- Taassuma ujaqqap eqqaani misissuillunga nassaarivara itummanninngaanniit immaqa mikineruvorluunniit. Kaasarfinnut iligakku taamanili pigeruusaaqqaqarpara.
Suulooqqap ujarak tuttunniarluni nassaarisani ajugaassutigissallugu naatsorsuutigisimanngikkaluarpaa.
- Aatsaat sorpiaanersoq paaserusullugu nassiuppara. Sunaaffa 1-nngussutissara.
AAMMA ATUARUK Ujarassiorit 2019-imi ajugaasoq nalaatsornerinnakkut ujaqqamik nassaartoq
Ujarassiorimmi ajugaasoq akileraarutitaqanngitsunik 55.000 koruuninik aamma aningaasannattarpoq, aningaasallu taakku juullinnginnerani nakkartinneqassapput.
- Pilluarujussuarit juullisiorluarnissannillu kissaappakkit. Tulliani tuttunniarnak diamantinik ujaasisinnaavutit, Jens Frederik Nielsen ajugaasumut tusagassiortunik katersortitsinermi oqarpoq.
Sumiiffimmi immaqa diamanteqartoq
Aatsitassanut naalakkersuisoqarfimmi ujarassiooq, Debora Hansen Kleist Ujarassiorimmi ajugaasussamik toqqaaqataavoq.
Kimberlittit immaqa ilisarnarpalunngillat. Diamantilli kimberlitseqarfimminngaanneertarput.
Taamaammat una ajugaasutut toqqarneqartoq, Debora Hansen Kleist oqarpoq.
- Ujarak aatsitassanik kimberlittini diamanteqartuni nassaarineqakkajuttunik akoqarpoq. Nunatsinni kimberlitsinik nassaartoqareernikuuvoq, kisianni nunarsuarmi sumiiffinni amerlasuuni nassaarineqarneq ajorpoq.
Sumiiffik siunissami misissorluarneqarumaartoq, Debora Hansen Kleistip ilanngullugu oqaatigaa. Ujarak Amitsuarsuup Kangerluani Napasup avannaata kangiani nassaarineqarpoq. Tamatumalu saniatigut ujarak qaarsummi peerneqarsinnaanngitsumeersoq nutaamik nassaartoqarpoq.
Aatsitassaq Suulooraq Jessenip aatsitassanut naalakkersuisoqarfimmut nassiussaa misissugassatut nassiunneqartut 750-it ilagaat.
Kista Nathanielsen Ujarassiorit 2020-mi ajugaasup aapparaa.
Taassuma gnejs sulfiditalik Sermiligaamit avannamut kimmut Anaanap Kangertiva Oqqortimi nassaani ajugaassutigaa.
Kista Nathanielsenip nassaani 25.000 koruuninnassutigaa.
Ajugaasut pingajuatut toqqarneqartut marluupput, taakku akileraarusigaanngitsumik immikkut 10.000 koruuninnapput.
Uani annerusumik atuagaqarsinnaavutit.