Ujarassiorit 2019-imi ajugaasoq nalaatsornerinnakkut ujaqqamik nassaartoq
Ujarassiorit 2019-imi inuit katillugit arfineq pingasut akissarsitinneqarput.
Uummannap eqqaani Ikerasammeersup, Louise Therkildsenip Sigguup kujataani qeqertami Anginermi ujarak nassaani ajungaassutigaa, ujarak nassaarineqartoq ujaqqat innermik anitsinermi pinngortut akornanni imerpalasunik kissartunik aqqutigineqanermigut aatsitassanik ilaatigut, sulfiditalinnik kuultimillu akoqarpoq.
Saffiugassat tassaapput kuulti, arsen aamma thallium - sumiiffiup eqqaani ujaqqat akornanni kuultitalinnik aatsitassaqarfeqarsinnaanera ilimanarsisippaa.
Pisuttuarluni nassaarigaa
Louise Therkildsen uinilu umimmanniareerlutik qatsorsiiutigalutik Sigguup kujataani qeqertami Anginermiipput, Louisellu pisuttuartilluni ujarak nassaarisaa, ukiut milliuunilikkuutaat arlallit matuma siorna pinngorsimassasoq, Aatsitassanut Naalakkersuisoqarfimmi, ujarassiooq, Jonas Petersen oqarpoq.
- Qatsorsiillutik pisuttuarsimavoq, ujarallu mangertornisimasoq nassaarisimallugu, Louisep ilisimavaa ujaqqat taama ittut aatsitassarsiortunit soqutigineqarsinnaasut, taamaattumillu ujarassiorimmut nassiuppaa, ujarassiornermilu akissarsitinneqartussatut aallaqqaammulli nalilerparput, ujarassiooq, Jonas Petersen oqarpoq.
Ajugaasup aappaa
Akissarsitinneqartup aappaa, Qaarsunneersuusoq,Therkild Hansen akileraarutitaqanngitsunik 25.000 koruuninik akissarsitinneqarpoq. Ujarak Qaarsut eqqaanni nassaarineqartoq ujaraavoq basaltimik nikkelimillu akulik.
Nuussuaq nikkelimik kanngussammillu ujaasiffissatut pilerinaateqarpoq, Qaarsuullu kujammut kitaani nikkelimik kanngussammillu aatsitassaqarfinnik ujarlernissamut periarfissaqarsinnaaneranik takussutissiilluni.
Namminersorlutik Oqartussat nittartagaanni tamanna aallaaserineqarpoq.
Akissarsiat pingajuanni inuit marluk immikkut akileraarutitaqanngitsunik 10.000 koruuninik akissarsitinneqarput:
Narsameersoq, Laura Jensen
Attumeersoq, Otto Ugpernangitsoq
Akissarsiat sisamaanni inuit sisamat 5.000 koruuninik aningaasartalinnik akissarsitinneqarput:
Kangersuatsiameersoq, Ludvig Knudsen
Qaanaameersoq, Aninaaq Kivioq
Nuummeersoq, Kristian-Henrik Hansen
Nuummeersoq, Aviaaja Olsen
2019-imi Ujarassiorimmut ujaqqat 1100-it nassiunneqarsimapput. Taakkunannga 169-it ilaatigut aatsitassartalittut nalilerneqarlutik.
Ajugaasunik toqqaapput Aatsitassanut Naalakkersuisoqarfimmi aamma Danmarkip Kalaallit Nunaatalu Ujarassiornermik Misissuisoqarfiani ujarassiortutut atorfillit aatsitassalerinermik ilisimasaqartut.
Allaaserisaq uani atuaruk.