Jens Napaattooq Inatsisartunut qinigassanngorteqqinnianngitsoq

Jens Napãtôk Ittoqqortoormiini borgmesteriunikuuvoq, langstingiusimasumi ilaasortaanikuuvoq, Inatisartunullu siullermeerluni 2018-imi qinigaalluni.

Inatsisartunut 2021-mi qinersisoqarmat 324-nit taaguunneqarpoq. Taanna Avannaata Kommuniani kommunalbestyrelsimut 213-init taaguunneqarluni aamma qinigaavoq.

Maannali naammalerpoq. Politikerimi Inatsisartunut ukiup ataatsip ingterlanerani qinersisoqaqqilerpat qinigassanngorteqqinnianngilaq.

Taassuma tamanna Facebookimi quppernermini nalunaarutigaa.

- Inatsisartunut qinersisoqalerpat sassaqinniarnanga oqariartornikuugama sulisartutut tamakkiisumik suleqqilersinnaanissaq siunniuppara suli utoqqalinnginninni, Jens Napãtôk allappoq.

Sulinngiffeqartoq

Naleqqamit politikeri2021-mi qinersisoqarnerata kingunitsianngua sulinngiffeqarnissamik qinnuteqarpoq.

Tamanna Jens Napãtuup aalakoorluni aapparminut sioorasaarineranik videoliamik Facebookikkut siammarterisoqarneranik pissuteqarpoq. Politikeri politiinut unnerluutigineqarpoq, Kalaallit Nunaanni Politiilli suliaq unitsiinnarpaat, taamaammat eqqartuussivitsigut suliaqartoqanngilaq.

Jens Napãtôk tamatuma kingorna Allorfimmi imigassartornermik katsorsarneqarpoq - taassumalu nammineq oqarnera naapertorlugu tamanna pissarsiaqarfigingaatsiarpaa. Taassuma ilaqutani aamma katsorsarteqatigai.

Qinigaq Inatsisartunut uteqqippoq, naallu aallartinnera sakkortugaluartoq taassuma qinigaaffimmini angusimasani naammagisimaarpai.

- Qineqqusaarutikka sinnerlugit angusaqartarnikuugama neriuppunga qinersisikka pakatsisissimanagit.

- Ikerinnakkut qinersisoqanngippat suli ukioq ataaseq ilungersoqataaqqissaanga nunap inui pillugit, taanna Facebookikkut allappoq.

Jens Napãtôk 2021-mi qinersinerup kingorna Naleqqap IA-mik naalakkersuisoqateqarnerata nalaani Inatsisartut Aningaasaqarnermut Akileraartarnermullu ataatsimiititaliaani siulittaasuullunilu  Aalisarnermut, Piniarnermut Nunalerinermullu ataatsimiititaliaani siulittaasuuvoq.

Jens Napãtôk arlaleriarluni eqqartuunneqarsimavoq. Taanna siornatigut Landstingimik taaneqartartunit 2005-imi tunuarpoq, tassani namminersornerullutik oqartussat aningaasaataannik imminut atuisimanera pissutaavoq. Aningaasat imigassarsiniarnerput, cigarettersiniarnermut Københavnimilu striparimut ilaatigut atorneqarsimapput.

Politikeri 120.000 koruuninik atornerluisimanini pissutigalugu qaammatini sisamani pinerluuteqarsimasunut inissiisarfimmiittussanngortinneqarpoq.