Napaattooq qinigaasinnaatitaavoq

Inatsisartut Parti Naleqqameersoq Jens Napaattooq, arlaleriarluni pineqaatissinneqarsimasoq, Inatsisartunut qineqqusaarsinnaatitaanersoq marlunngornermi aaliangiiffigivaat.

Jens Napaattooq 2005-imi Namminersornerullutik Oqartussat aningaasaataannik atornerluisimanera paasineqarmat, Naalakkersuisuniit tunuarpoq. Aningaasat ilaatigut imigassanik, cigaretsinik stripbarimullu atornerlunneqarsimapput.

Jens Napaattuup aningaasanik 120.000 koruunit sinnerlugit atornerluinerminut qaammatini sisamani isertitsivimmut pineqaatissinneqarpoq. Jens Napaattuulli inatsisinik unioqqutitsinerminut aatsaat pineqaatissinneqanngilaq.

Politeeqarfiup tungaanut aallaasersorsimasoq

Jens Napaattooq 1995-imi Inatsisartunut qinigassanngortimmat, marloriarluni pineqaatissinneqarsimanera aalassassimaarutaasimavoq. Jens napaattooq Ittoqqortoormiini inoqarnersoq qulakkeeqqaarnagu politeeqarfiup tungaanut aallaasersorsimanera pineqaatissinneqarneranut ataatsimut peqqutaasimavoq.

AAMMA ATUARUK Deloitte: Napaattooq og Frederiksen misbrugte konto

1995-imi Jens Napaattooq Inatsisartunut qinigaasinnaatitaanera itigartitaavoq, kingornali 2000-kkunni, Hans enoksen-ip Naalakkersuisut Siulittaasuunerani, Naalakkersuisunngorpoq. Jens Napaattuup Partii Naleqqami Enoksen maanna aamma siulittaasorivaa.

Jens Napaattooq 128-nik qinersisoqarluni, Partii Naleqqami qinikkani sisamaattut, Inatsisartunut qinigaavoq.