Jens B. Frederiksen: Inatsisinik unioqqutitsisoqanngilaq
- Uanga ersarissumik oqaatigisinnaavara nalunaarusiaq naapertorlugu iliuuseqarpugut. Inatsisinik unioqqutisisoqanngilaq, inissianummi akit qaffassallugit nalunaarutitigut periarfissaavoq, Ineqarnermut naalakkersuisoq Jens B. Frederiksen oqarpoq.
Inatsisartunut ilaasortap, inatsisinullu ataatsimiititaliami siulittaasup, Isak Hammondip Inuit Ataqatigiinneersup, aamma Siumut sinnerlugu inatsisartunut ilaasortap Malik Berthelsenip ineqarnermut akiliutigineqartartut qaffanneqarniarnerannut isornartorsiuinerminni sapaatip-akunnerata siuliani oqaatigigaluarpaat taama aalajangiineq inatsisinik unioqqutitsinerusoq.
Missingersuusioqqaarani inissianik attartornermut akit qaffanneqarpata, tamanna inatsisinik unioqqutitsinerusinnaasoq, eqqartuussissuserisup, Lissi Olsenip, inatsisilerituut suliffeqarfiutaanni INA:NUNA-meersup aamma oqaatigaa.
Qaffaasoqarnsisaali naalakkersuisut aalajangiusimagaat, Jens B. Frederiksenip oqaatigaa, periarfissallu marluunerarlugit:
- Kvadratmeterit aallaavigalugit qaffaasoqarsinnaavoq, kisianni aamma periarfissaqarpoq immikkut arlaannik pisoqarpat inissianut tamanut assigiimmik aalajangersimasumik akinik qaffaanissaq. Akinik qaffaaniarneq attartortunut pisortatigoortumik januaarimi aatsaat nalunaarutigineqartussaavoq, kisianni tamatta eqqarsaatigisariaqarparput: Sunaana uani eqqartorneqartoq? Inissiat peqqissutsimut ulorianaateqarsinnaasut eqqartorneqarput. Taamaammat naalakkersuisut maanna iliuuseqarput, tassa pingaarnersaa, Ineqarnermut naalakkersuisoq Jens B. Frederiksen oqarpoq.
Ineqarnermut akit qaffanneqarnissaat pillugit aappaagu januaarimi pisortatigoortumik nalunaarutigineqarumaarput, kisitsisillu tunngavigineqartussat maanna misissorneqaleruttorlutik.