Iluliarsuit tissukartut umiarsuarnut Kalaallit Nunaata eqqaaniittunut ulorianartorsiornerulersitsisut

Kalaallit Nunaata imartaani iluliarsuit 2000-imiilli sisamariaammik amerleriarsimapput.

Tamanna misissuinermi nutaamit, DTU Spacemi ilisimatusartut Tysklandimeersunik Amerikameersunillu suleqateqarlutik suliarisimasaannit paasinarsivoq.

Silap kissakkiartornera pissutaalluni sikorsuit angisuut immamut nakkaasarput.

Ilisimatusartut oqarnerat naapertorlugu, tamanna takornariartaassuit assartuutillu angalaffigisaminni iluliarsuarnik siumugaqarnissaannik ilimanarnerulersitsivoq.

- Kalaallit Nunaata sermersua aakkiartortillugu imaq qaffakkiartorpoq. Allanngornerilli issittumi pissutsinut tamarmiusunut sunniuteqarnerat aamma takusinnaavarput, professori Shfaqat Abbas Khan DTU Space-mit tusagassiuutinut nalunaarummi oqarpoq.

Ilisimatuut Kalaallit Nunaata Svalbardillu akornanni Framstrædemi iluliarsuit ukiuni 40-ni misissuiffigineqartarsimasut qaammataasakkut paasissutissanut, sikumik assilialiornermut immallu naqqanik misissuinernut sanilliuppaat.

Immamut tissukalersartut

Ilisimatuut oqarneri naapertorlugit, iluliarsuit amerlanerulernerat Tunup avannaata-tungaani sermersuit angisuut arlallit nikinnerusalernerannik serminillu aniatitsinerulersimanerannik pissuteqarpoq.  

Tamatuma kingunerisaanik iluliarsuit amerliartuinnartut immamut tissukartarput.

Tamanna ilutigalugu imaq sikukinnerulerlunilu siku nikinnerusinnaanerulerpoq.  

Tamanna iluliarsuit Issittukkoorlutik isorartuumik ingerlaarnissaannut ajornannginnerulersitsivoq.

Ilungersunartorsiortitsisinnaasut

Iluliarsuit amerliartuinnarnerat sumiiffimmi tassani umiarsuarnik angallassinermut ilungersunartorsiortitsisinnaanerat misissuinerup takutippaa.

Taamaattumik ilisimatusartut ilulianik nakkutilliilluarnerulernissaq siusinnerusukkullu ilimasaarisoqartarnissaa umiarsuarnik angallassinermut aalisarnermullu iluaqutaassasoq erseqqissaatigaat.

Ilisimatuut iluliarsuit immap uumasuinut qanoq sunniuteqartarnersut aamma misissorsimavaat.

Ujaqqammi kinnerillu iluliarsuarnit nunamiit immamut kilometerinik hundredelikkaanik ungasitsigisumut nassatarineqartarput.

Ujaqqat kinnerillu immap naqqanut kiviartortarput, ilaatigut pupiisanut, immap naasuinut uumassusilinnullu allanut najugaqarfiulersitsisarlutik.

Taamaalilluni Issittumi silap pissusiata allanngoriartornera angisuumik kinguneqassasoq, ilisimatusartut oqarput.

- Immap qaffakkiartornera kingunerinnaanani, immamili itisuumi sermersuarnit ungasissumi uumassusillit toqqaannartumik sunnigaanerat misissuinerup nutaap takutippaa, Shfaqat Abbas Khan oqarpoq.

Misissuineq tamanna ilisimatuussutsikkut atuagassiami Naturemi saqqummersinneqarpoq.

/ritzau/