Jakob Janussen: Uku piffissanngorpat namminersulivinnissamut taasisinnaatitaapput
Naleqqameersup, Pele Brobergip danskit aviisiannit Berlingskimit apersorneqarnerata kingorna oqallittoqangaatsiarpoq, ilaatigut pissaanillit akornanni.
Taannami nunatsinni namminiilivinnissaq pillugu naggueqatigiinnit inunnit kingoqqisut kisimik taasisinnaatitaasariaqartut Berlingskimi apersorneqarnermini oqarpoq. Taamatullu oqaaseqarnera nunanut allanut tunngasunut naalakkersuisutut atuuffimmik naleqarpoq.
AAMMA ATUARUK Pele Broberg nunanut allanut tunngasunut naalakkersuisuujunnaartoq
Nunatta namminersulernissaanik inatsisimmik suliarinnittunit siuttut ilaata, inatsit suliarigamikku kikkut eqqarsaatigisimaneritik maanna oqaasertalerpaa:
- Inatsimmi aalajangersakkami tunngatillugu oqaaseqaatini ilaatigut eqqaaneqarpoq naatsorsuutigalugu inuiaat kalaallit tassaasut pisortani qinersineqartillugu, soorlu Inatsisartuni ilaasortassanik qinersineqartillugu, kommunalbestyrelsemut ilaasortanik qinersineqartillugu aammalu nunaqarfinni oqartussanik qinersineqartillugu nunatsinni nunaqavissutut isigineqarsinnaasut, Jakob Janussen KNR-imut oqarpoq.
AAMMA ATUARUK Pele Brobergip kikkut nunatsinni qinersisinnaatitaassanersut oqallisigineqartariaqarsoraa
Tamatuminngali oqallinneq pingaaruteqaqisoq taanna isumaqarpoq.
- Massakkullu inatsisit atuuttut malillugit tassaapput kikkulluunniit nunatsinni najugaqavissutut allanneqarsimasut. Avataaneersullu tassaallutik Danmarkimi innuttaassuseqartut aammalu sivikinnerpaamik qaammatini arfinilinni nunatsinni najugaqavissimasut, Jakob Janussen oqarpoq.
Namminerlu isummani malissaguniuk taamaattoqartariaqarsoraa. Inunnummi piumasaqartoqarsinnaanngilaq, taakkununnga tunniussaqarani.
- Pisinnaatitaaneq pisussaaffeqarnerlu immikkoortinneqarsinnaanatik imminnut atapput. Inuit piumaffigisinnaanngilagut ima ittunik pisussaaffeqarpusi, kisianni pisinnaatitaaffeqanngilatit, Jakob Janussen oqarpoq.