Ivalumik isiginnaagassiortut tusaamasat akornannukartut
Isiginnaagassiamik naatsuliamik Ivalumik isiginnaagassiortut maanna Hollywoodimukariartorput, tassanilu Oscarip 95-issaanik nersorsaasiinerani nunarsuarmi tusaamasaanerpaat akornanni issiassallutik.
Ivalumi Oscarimit inuusaliamik naatsuliamut pitsaanerpaamut nersornaaserneqartussatut innersuunneqartut tallimat ilagaat.
Isiginnaagassiorfissuarmit Disney-mit naatsuliaq Le Pupille Ivalup nersornaaserneqartussatut toqqarneqarnissaanut aporfiusinnaavoq.
- Isiginnaagassiorluarnissamut tunnganerata saniatigut qaammarsaanermut tunngavoq. Tassani Disney-mut unammisinnaanersugut takujuminaatsippara, Anders Walter isiginnaagassiap naatsuliap innersuunneqarnerata kingunerani oqarpoq.
Ilaqutariit kalaallit pillugit oqaluttuaq nuanniitsoq
Isiginnaagassiami kalaallit ilaqutariit nunaqarfeeqqameersut tunngavigineqarput. "Ivalu"-mi paniusoq nukarleq, Pipaluk qatanngutiminik maqaasisaminik ujaasisoq malinnaaffigineqarpoq. Kalaallit oqaluttuaataat aamma ilaqutariit nuanniitsumik avissaartuunnerat pillugu oqaluttuanut ataatsimoortinneqarput.
- Torrallatamik filmiliornissarput kissaatigaarput, kisianni sammisap oqallisigineqanngilluinnartup oqaluuserineqarnissaa aamma kissaatigaarput, filmiliamik ilitsersuisoq, Anders Walter KNR-imut oqarpoq.
Naak isiginnaagassiami kalaallit ilaqutariit nunaqarfeeqqameersut tunngavigineqaraluartut Anders Walterip inuiaqatigiinni ajornartorsiutaasut kisiisa eqqartorniarsarinngilai.
- Kalaallit Nunaanni pisuunersoq allamiinnersorluunniit apeqqutaanngilaq. Filmimi sammineqartoq nunarsuarmi sumiluunniit pisimasuusinnaavoq.
Meeqqat pisariaqartitaat filmiliamik ilitsersuisup ilitsersuisuuffigisaanni arlalinni sammineqarluartarput.
Nunarput takutissinnaagamiuk tulluusimaartoq
Filmimi inuttaq pingaarneq, Pipaluk, aqqanilinnik ukiulimmit, Mila Heilmann Kreutzmannimit inuttaaffigineqarpoq. Taassuma Oscarimi isiginnaagassiani nersornaaserneqarnissamut innersuunneqartuni ilaanini nunarpullu nunarsuarmi nersornaasiinerit annerpaat ilaanni nunarput ilisaritissinnaangamiuk tulluusimaarpoq.
- Tulluusimaartorujussuuvunga nuannaarujussuarpunga aamma kalaaleqatikka sinnerlugit, Mila Heilmann Kreutzmann oqarpoq, nangillunilu:
- Misigisimavunga angusaqarsuataarlunga, hollywoodilialerpungami.
Isiginnaagassiamik ilitsersuisoq, Anders Walter Oscarimit naatsuliani Helium inuusaarannassutigereernikuuaa, taassumalu innersuunneqaqqinnini nuannaarutigaa:
- Nuannerluinnarpoq. Kusanarluinnartumik isiginnaagassioqataasut sinnerlugit nuannaarlungalu tulluusimaarluinnarpunga, taanna oqarpoq.
"Ivalu" danskit isiginnaagassiortarfianit isiginnaagassiaavoq. Taannali isiginnaagassiorfik Polarama Greenland isiginnaagassiortartumik ilitsersuisumillu Pipaluk Kreutzmann Jørgensenimik siuttuuffigineqartoq suleqataaffigineqarpoq. Polarama Greenlandip kalaallit filmiliaritittartut isiginnaartitsisartullu sulilersinnissaat ilaatigut isumagaa.
