Nunarput Hollywoodimi: Ivalu Oscarinnannissamut qanilliallattoq
Ivalu. Angajora. Aaqatiga. Kialuunniimmi sumiittutit naluaa.
Taakku oqaatsit filmeeqqap nutaap kalaallisut oqaluffiusup pilerisaarutitaani tusaaneqarsinnaapput.
Filmeeraq ateqarpoq Ivalu, tassani paniusup nukarliup Pipaluup angajuni Ivalu maqaasineqartoq ujarpaa. Kalaallit oqaluttuaataat aamma ilaqutariit nuanniitsumik avissaartuunnerat qanigisamiillu kinguaassiutitigut kannguttaatsuliorfigitinnermik oqaluttuat ataatsimoortinneqarput.
- Torrallatamik filmiliornissarput kissaatigaarput, kisianni sammisap oqallisigineqanngilluinnartup oqaluuserineqarnissaa aamma kissaatigaarput, filmiliamik ilitsersuisoq, Anders Walter KNR-imut oqarpoq.
Ivalu
Filmeeqqami oqaluttuaavoq kalaallit ilaqutariit avissaartuuttut paniat angajulleq Ivalu taammaaneqartoq.
Nukaasoq Pipaluk unnuakkut sinnattorpoq tulukkamit angajuminut Ivalumukaanneqarluni. Pipaluullu tulugaq ullaakkut takugamiuk malilerpaa.
Titartakkanik oqaluttualiaq atuakkiortup Morten Dürrip titartaasartullu Lars Hornemanip atuakkiaat aallaavigalugu filmeeraliaq suliarineqarpoq.
Pilerisaarut una toorlugu takusinnaavat.
Filmeeraq Ivalu filmeeqqat pissanganartuliat Oscarimut innersuunneqarsinnaasut allattorsimaffiannut ilanngunneqarpoq. Tamanna Oscar akademiip nittartagaani atuarneqarsinnaavoq.
- Siullermik inuit taama amerlatigisut filmimik nuannarinninnerat soqutiginninnerallu tulluusimaarutigalugu qujamasuutigaara, filmimik ilitsersuisoq oqarpoq.
AAMMA ATUARUK Cannes kalaallit filmiliaannik siullerpaamik takutitsiffiulersoq: - Sunniuteqartorujussuussaaq
Filmeerarli Hollywoodimi filmiliullammassuarnut nunarsuarmi tamanit ataqqisaasunut takutinneqannginnermini innersuunneqaqqaartariaqarpoq.
Filmit Oscarimut innersuunneqarsinnaasut allattorsimaffianniittut 15-iusarput, innersuunneqartussalli tallimaannanngortinneqartussaapput.
Ilitsersuisoq Oscarinnareersoq
Filmeeqqami ilitsersuisoq tassaavoq ilitsersuisoq danskeq Anders Walter. Taassuma filmeeqqaat ilitsersuisuuffigeriigai iluatsilluareerput.
Ilitsersuisup filmeeraliaa 9 meter Oscarimut innersuunneqarsinnaasut allattorsimaffiannut siornatigut ilanngunneqarnikuuvoq. Filmeerarlu Helium 2014-mi Oscarinnassutigaa.
Taanna Hollywoodimi inuusalianngamik filmiliullammassuit pilerigisaqisaannik piginnittuuleqqissinnaavoq. Ivalu nersornaaserneqassappat nersornaaserneqassanngippalluunniit filmeeqqap oqallisaanera ilitsersuisup suli nuannaarutigissanerarpaa.
- Filmiliami peqataasut tamarmik sammisap oqaluuserineqarnissaa kissaatigilluinnarpaat, filmilu una ajornartorsiutaasumik oqaluuserinninnerulersitsisinnaavoq, Anders Walter oqarpoq.
Taarseriorfimmi neriuut
Naak isiginnaagassiami kalaallit ilaqutariit nunaqarfeeqqameersut tunngavigineqaraluartut Anders Walterip inuiaqatigiinni ajornartorsiutaasut kisiisa eqqartorniarsarinngilai.
- Kalaallit Nunaanni pisuunersoq allamiinnersorluunniit apeqqutaanngilaq. Filmimi sammineqartoq nunarsuarmi sumiluunniit pisimasuusinnaavoq.
Meeqqat pisariaqartitaat filmiliamik ilitsersuisup ilitsersuisuuffigisaanni arlalinni sammineqarluartarput.
- Oqaluttuat taarsiorfinnut tunngasut tikinneqarnissaat uannut pingaaruteqarput. Aamma taarseriornerpaaffiit.
- Aammali neriuuteqartoqartariaqarpoq. Aamma asanninnerup ataqatigiissutaasup, imminut akisussaaffeqatigiinnertaqartup oqaluuserinissaa, kiisalu tunuinnarluni isiginngitsuusaaginnartoqannginnissaa, ilitsersuisoq oqarpoq.
Kalaallimik suleqateqartoq
Naak Ivalu danskit filmiliarigaluaraat, filmiliortarfiup Polarama Greenlandip filmiliortartumik, ilitsersuisumillu Pipaluk Kreutzmann Jørgensenimik siuttuuffigineqartup suleqatigineratigut suliarineqarpoq. Polarama Greenland kalaallinik filmiliaritittartunik isiginnaartitsisartunillu pissarsiornermik ilaatigut suliaqarpoq.
Suleqatigiinnerli ima qanitsigilerpoq allaat Pipaluk Kreutzmann Jørgensen naggataatigut filmiliornermi ilitsersuisooqataalerluni.
- Andersilu filmiliornermi qanimut suleqatigiippugut. Kingorna oqaannarpugut, okay tamatta qanoq akuutiginerluta takusinnaavarput, taamaammat ilitsersuisooqataalerpunga, Pipaluk Kreutzmann Jørgensen KNR-imut oqarpoq.
Taassuma filmi nunatsinni inuiaqatigiinnut politikerinullu uisitsilaassasoq neriuutigalugu ilanngullugu oqaatigaa.
- Filmi una ingerlalluarsinnaasorujussuuvoq. Kisianni oqaluttuaatigut aamma uagut atorluarnerusinnaavagut. Tamanna ukiorpassuarni anguniarparput, taanna oqarpoq.
Oscar academyp filmit nersornaaserneqarnissamut innersuunneqartut 2023-milu marsip 12-iani Oscar-showeqarnissaanullu inuusaliaarannanniartussat tallimat 2023-mi januaarip 24-ani saqqummiutissavai.
Ivalup tamanut saqqummiunneqarnissaanut pisortatigoortumik suli ulluliisoqanngilaq. Filmiliamik ilitsersuisup oqarnera naapertorlugu filmi aappaagu filmfestivalini assigiinngitsuni, siullermillu 2023-mi januaarip 20-anit 29-anut Australiami Sydneymi Flickerfestimi saqqummiuteqqaarneqassaaq.
