Cannes kalaallit filmiliaannik siullerpaamik takutitsiffiulersoq: - Sunniuteqartorujussuussaaq
Tupinnartupilussuuvoq.
Filmiliortartoq Emile Hertling Péronard kalaallinit filmiliamik filminik Frankrigimi Cannesimi festivalertitsinermi ataqqinenartumi siullerpaamik takutitsisoqarnissaa pillugu taama oqarpoq.
Kalaallit filmiliaat Cannesimi takutinneqartoq
- Kalaallit piviusulersaarusiaat "Polaris" Cannesimi maajip ulluisa 24-anni takutinneqaqqaassaaq. Taanna kalaallit filmiliaanni siullerpaalluni festivalimi takutinneqassaaq.
- Ánorâk Film Emile Hertling Péronardimit Inuk Silis Høeghimiillu pigineqartoq filmimik ingerlatsisooqataavoq.
- Umiarsuup naalaagaa Frankrigimeersoq Algeriamiunillu kingoqqisuusoq Hayat Mokhenache piviusulersaarummi Polarisimi pingaarnetut inuttaavoq
- Filminik Cannesimi festivaali filminik festivalini nunarsuarmi ataqqineqarnersaavoq. Maajip ulluisa 17-ianni aallartippoq, maajillu ulluisa 28-anni naammassissalluni.
Tassami piviusulersaarutip Polarisip Cannesimi siullerpaamik maajip ulluisa 24-anni takutinneqarnissaa nunatsinni filmliornerup oqaluttuarisaanerani pingaaruteqarpoq.
- Sunniuteqartupilussuuvoq, taavalu nunatta silarsuarmi maanna soqutigineqartupilussuuneranut takusinnaasatsinnut naleqqulluni, Emile Hertling Péronard oqarpoq.
Umiarsuarmi naalagaq frankrigimiu algeriamiunit kingoqqisuusoq Hayat Mokhenache Issittup imartaani umiartortoq Ánorâk Filmip franskillu filmiliornermik ingerlatseqatigiiffiata Les Films du Balibarip piviusulersaarusiaanni Polarisimi sammineqarpoq.
Emile Hertling Péronard Inuk Silis Høeghilu Ánorâk Filmimik piginnittuupput.
Nunatsinni filmiliornermi ingerlalluartoqartoq, piviusulersaarusiap Cannesimi takutinneqarnissaata takutikkaa, Emile Hertling Péronard oqarpoq:
- Nunatsinni filmiliortartuulluni piffissaq manna pissanganartupilussuuvoq. Kalaallit Nunaata arlalippassuartigut soqutigineqartupilussuunera malunartupilussuuvoq, tamannalu nunatsinni filmiliornermut sunniuteqartupilussuuvoq.
Filmiliortartut Polarisip immiunneqarneranut ingerlatsisut Hayat Mokhenache Ilulissani 2016-imi naapippaat. Assi: Polaris, Ánorâk Film/Les Films du Balibari
Kalaallit filmiliortartut amigaataasut
Nunatta nunanit allaneersunit kalaallinik filmiliortartunik peqataatitsinngitsunit saqqummiunneqarajunnera isornartorsiorneqarnikuuvoq.
Nunattali maanna soqutigineqartupilussuunera nunatsinni aamma filmiliornermut sunniuteqartoq, Emile Hertling Péronard oqarpoq.
- Filmiliortartut maanna taama soqutiginnittoqartigitillugu amigaataasut takusinnaavarput. Tamanna kalaallit filmiliortartut namminneq suliaqarnerannik pissuteqarpoq.
AAMMA ATUARUK Naalakkersuisoq for kultur vil være med til at styrke den grønlandske filmverden
Kalaallit filmiliortartut nunarput pillugu oqaluttuartarnissaat pingaaruteqartoq filmiliortartoq isumaqarpoq.
- Kalaallit filmiliortartut nunat tamalaat akornanni filmilianut suleqataanerminni misilittagaqalernerat pitsaavoq. Kisianni nammineq oqaluttuatta oqaluttuarisarnissaannut periarfissinneqarnissarput pingaarneruvoq. Taama soqutiginnittoqartigitillugu tamanna eqqumaffigissavarput. Taamaattoqassappallu kalaallit politikerit kalaallit filmiliaannik tapersersuinerunissaat pisariaqarpoq, Emile Hertling Péronard oqarpoq.