Kulturimut Naalakkersuisoq nunatsinni filmiliortarnermut nukittorsaaqataajumavoq

- Pissusissamisoorpoq taamaaliortoqarnera. Kulturimut naalakkersuisoq Petersen Olsen oqarpoq.

Nuannaatigisaa tassaavoq nunatsinni Savalimmiuni Danmarkimilu naalagaaffeqatigiinneq pillugu piviusulersaarutinik filmiliorumasunut, danskit 2021-mi aningaasanut inatsisaannit 27,1 mio. koruuninik aningaasaliisoqarnera.
Aningaasaliissutit NORDDOK II-tut taasat maajip pingajuanniit 2024-ip naanissaata tungaanut qinnutigineqarsinnaalissapput.

Filmiliornermut instituti

Nunatsinni filmiortartut kattuffiat aningaasalersuinernik assigusunik filmiliornermullu institutimik pilersitsisoqarnissaanik kissaateqarpoq.

Tamanna aappaagu aningaasanut inatsisissap suliarinerani eqqarsaatinut ilaasoq Kulturimut naalakkersuisoq oqarpoq:   

- Filmiliortarnermik aqutsiveqarfiup pilersinneqarnissaanut alloriarnerit siulliit siulliuteqqaalaarallartigit, taava ukiuni tulliuttuni takussavarput qanorpiaq angusaqartigisinnaanerluta.

Eqqumiitsuliornermut aningaasaateqarfik

Eqqumiitsuliornermut aningaasaateqarfik 2021-mi pilersinneqartoq filmiliortartunit qinnuteqarfigineqarsinnaaleerersoq nunatta karsianit, suliffeqarfinnit aningaasaateqarfinnillu aningaasalersugaassaaq. Peter Olsen:

- Neriuppunga pilersitsisimaneq tamakkununnga assigiinngitsunut aningaasaliissutigisartakkat amerlanerulernerannik kinguneqarumaartoq.

film.gl-ikkut isumaqarput allamiuinnaanngitsut uagulli nammineerluta nunarput piviusulersaarutitigut aamma oqaluttuarisinnaasariaqaripput. Tassunga Peter Olsenilu isumaqataavoq:

- Siunissami qaninnermi kissaataatit assigiinngitsut minnerusumik annerusumilluunniit piviusunngortikkiartuaarlugit aallartikkumaartut neriuutigaara, minnerunngitsumik filmiliortartut kattuffiallu peqatigalugu.