Ivalu Oscarinnannissamut innersuunneqartoq ilitsersuisorli ajugaanissamut qulartoq
Isiginnaagassiaq naatsuliaq Ivalu Oscarimut Naatsuliani Pitsaanerpaamut innersuunneqarpoq.
Ilitsersuisoq, Anders Walter Oscarimit inuusaliannareernikuuvoq, taassumalu innersuunneqaqqinnini nuannaarutigaa:
- Nuannerluinnarpoq. Kusanarluinnartumik isiginnaagassioqataasut sinnerlugit nuannaarlungalu tulluusimaarluinnarpunga, taanna oqarpoq.
Filmimi ilitsersuisoq Anders Walter saamimmut tulliuvoq, inuttaq pingaarneq Mila Heilmann Kreutzmann qiterliuvoq, talerpimmut tulleq filmimi ingerlatsisoq Rebecca Pruzan.
Taamaakkaluartorli “Ivalu”-p ajugaanissaanut atatillugu qularpoq. Maannakkummi innersuunneqarnermi isiginnaagassiorfissuarmit Disney-mit isiginnaagassiaq “Le Pupille” unammisussaavaa.
- Isiginnaagassiorluarnissamut tunnganerata saniatigut qaammarsaanermut tunngavoq. Tassani Disney-mut unammisinnaanersugut takujuminaatsippara, Anders Walter oqarpoq.
Taassuma isiginnaagassiaa naatsuliaq "9-meter" Oscarimut innersuunneqarnikuuvoq. Taannalu isiginnaagassiaq naatsuliaq "Helium" 2014-imi inuusaliannassutigaa.
Ilaqutariit nunaqarfimmeersut
Isiginnaagassiami kalaallit ilaqutariit nunaqarfeeqqameersut tunngavigineqarput. "Ivalu"-mi paniusoq nukarleq, Pipaluk qatanngutiminik maqaasisaminik ujaasisoq malinnaaffigineqarpoq.
AAMMA ATUARUK Nunarput Hollywoodimi: Ivalu Oscarinnannissamut qanilliallattoq
Filmimi inuttaq pingaarneq, Pipaluk, aqqanilinnik ukioqarpoq, Mila Heilmann Kreutzmann. Taanna Oscarimut innersuunneqarnini assut tulluusimaruutigalugu KNR-imut oqarpoq.
- Nuannaarsuaarpunga pississaarsuaarlunga qiallungalu, suli nuannaarsuaarpunga, taanna oqarpoq nangillunilu:
- Tulluusimaartorujussuuvunga nuannaarujussuarpunga aamma kalaaleqatikka sinnerlugit. Pississaarsuaarlunga, qaammassuaq utaqqinikuulluta kiisami. Misigisimavunga angusaqarsuataarlunga, hollywoodilialerpungami! ilaquttakkalu tulluusimaaqaagut.
"Ivalu" danskit isiginnaagassiortarfianit isiginnaagassiaavoq. Taannali isiginnaagassiorfik Polarama Greenland isiginnaagassiortartumik ilitsersuisumillu Pipaluk Kreutzmann Jørgensenimik siuttuuffigineqartoq suleqataaffigineqarpoq. Polarama Greenlandip kalaallit filmiliaritittartut isiginnaartitsisartullu sulilersinnissaat ilaatigut isumagaa.
Suleqatigiinnerli ima qanitsigilerpoq allaat Pipaluk Kreutzmann Jørgensen naggataatigut filmiliornermi ilitsersuisooqataalerluni.
"Ivalu"-p tamanut saqqummiunneqarnissaanut pisortatigoortumik suli ulluliisoqanngilaq. Ilitsersuisup, Anders Waltherip oqarnera naapertorlugu isiginnaagassiaq filmfestivalini assigiinngitsuni takutinneqaqqaassaaq.
