Ilinniarneq

Ivalo & Minik Fonden legatinik pingasunik agguaassisoq

Aningaasaateqarfik katillugit 300.000 koruuninik agguaassisoq, Ivalo & Minik Fondenimi siulittaasup tusagassiorfinnut nalunaarutigaa.
Ivalo & Minik Assi © : Brian Mølgaard/KNR
Allattoq Inge S. Rasmussen, Sara K. Jakobsen
apriilip 11-at 2018 10:03

Legatit Royal Arctic Line A/S-imit, Royal Greenland A/S-imit, GrønlandsBANKEN-ip Inuussutissarsiornermut aningaasaateqarfianit NunaFondenimiillu tunissutaasut tunngavigalugit aningaasalersugaasut, taassuma erseqqissaatigaa.

Tapiiffigineqartut pingasut Australiami, Norgemi USA-milu maanna ilinniartuupput.

Frederik Bork Jansenip DTU-mi teknikkimut tunngasumik ilisimatuussutsikkut ilinniarnerminut atatillugu Australiami Monash Universitymi masterinngorniarnermini semesterimi ataatsimi ilinniarnissaminut legatinnappoq.

AAMMA ATUARUK Aningaasaateqarfik ukiunut pingasunut qulakkeereqqittoq


Tusagassiortup Inga Hansenip nunap inoqqaavi pillugit tusagassiorneq pillugu Norgemi Sami Universitetimi masterinngorniarnerminut atatillugu legatinnappoq.

Kingullertullu Winnie Filemonsenip nutserisutut oqalutsitullu Ilisimatusarfimmi ilinniagaqarnerminut atatillugu USA-mi North Carolinami Duke Universitymi semesterimi ataatsimi ilinniarnissaminut legatinnappoq.
 

Legatimik qinnuteqarnissamut killigititaq tassaavoq oktobarip aallaqqaataa, siulersuisullu qinnuteqaatinik pitsaasunik amerlasuunik nassiussarsinissartik qilanaarigitsik, siulittaasoq allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk