Ittoqqortoormiini ilinniartitsisussaaleqineq anigorpaat: Ilinniartitsisugut sinneqalerput

Tasiilami alivarpimmi ilinniartitsisunik ilinniarsimasunik 22-nik amigaateqarput. Tunulli avannarpasinnerusortaani  Ittoqqortoormiini ilinniartitsisoqarneq allarluinnartut inissisimavoq. Ittoqqortoormiini ilinniartitsisut pisariaqartinneqartut sinnerlugit ullumikkut sulisoqarput, taamaammallu ilinniartitsisut ilaat Majoriami ilinniartitsisinnaanissaminnut periarfissaqartarput.

- Ilinniartitsisoqarniarneq massakkut ajunngitsumik inissisimavoq, Ittoqqortoormiini Aluarpimmi pisortaq, Jonathan Petersen oqarpoq.

Ittoqqortoormiini Ejnar Mikkelsenip aluarpiani ilinniartitsisut 13-iupput, taakkunannga qulit ilinniartitsisutut iliniarsimapput, ataaseq najugaq qimannagu ilinniartitsisunngorniartoq marlullu timelærerit.

AAMMA ATUARUK Tasiilami atuarfiup pisortaa: Ilinniartitsisussaaleqineq annertooq atuartitsinermut ajoqutaavoq

Ilinniartitsisut sisamat Ittoqqortoormiininngaanneerput. Taakku ilinniartitsisunngorniarnerminni nunagisaminni suliffimmik misiliinikuupput – naammassigamillu nunaminni atorfinitsinneqarlutik.

- Uanga aamma atuarfimmi pisortatut pingaartissimavara nunaqavissut nunaminni ilisimaarinnittut ilinniarsimasut salliullugit atorfinitsinnissai, Jonathan Petersen oqarpoq.

Taamaakkaluartoq sulisut qallunaajugaluarpata kalaaliugaluarpata suleqatigiissinnaagaanni pingaartikkini taanna oqarpoq.

- Sumiluunniit suliffimmi toqqissisimagaangatta aamma sulisutut aamma aalajaatsuunissaq nuisarpoq. Taannaagunarpoq aamma maani aalajaakkiartuaarnitsinnut aamma peqqutaasoq. Soorunami aatsaat ukiut marlunnguleraluarpakka kisianni nalunngereerpara sumunnartugut.

Ittoqqortoormiini iluatsissinnaappat aamma Tasiilami iluatsissinnaavoq

Tunumi illoqarfiup aappaani Tasiilami, ilinniartitsisoqarniarneq allatut inissisimavoq. Ilinniartitsisuni 62-iusuni ilinniartitsisut qulit aggustimiit apriilimut soraarniuteqarput, tassa maanna Tasiilami Alivarpimmi ilinniartitsisut ilinniarsimasut 22-t amigaatigineqarput.

Tasiilami Alivarpimmi pisortaq Jørn Holbæk apriilip ulluisa 22-anni suliunnaarsitaagallarpoq, Tasiilami Alivarpimmi ilinniartitsisut sinniisuata oqarnera naapertorlugu, ilinniartitsisut aqutsisullu akornanni suleqatigiinniarneq piffissamik sivitsortumik pitsaanngilaq.

Ilinniartitsisut aqutsisullu suleqatigiinniarnermikkut aaqqiagiinngissuteqartartut, taanna oqaluttuarpoq.

Atuarfimmili taamaattoqartillugu atuartut ilikkagassaannik naammattumik tunniussisoqarsinnaanera kalluarneqartartoq, Mitdlarak Lennert oqarpoq.

- Pingaaruteqartorujussuuvoq atuarfiup pisortaat ilisimaarinninnissaa ikiorteqarnissaalu, arlaatigut nalorniffinni saaffissaqarsinnaanissaa immaqaluunniit qanoq iliorsinnaanermik paasiniaaffissaqarnissaa. Taamaanngippat aaqqiagiinnginnerit pilertarput ajornartorsiutinngorlutik.

Ittoqqortoormiini Ejnar Mikkelsenip aluarpiani pisortap Tasiiami Alivarpimmi ajornartorsiutit qaangerneqarsinnaanerarpai.

- Aap, ilimagilluinnaqqissaarpara, soorunami apeqqutaapput; sulisui allanngorusuppat? Immaqaluunniit pisortamik suleqateqarusuppat? Pingaarnerpaavoq suleqatigiissinnaaneq, taanna oqarpoq.

13-iinnarnik ukioqarlutik Nuummut aallattarnerat unittoq

Ittoqqortoormiini atuartut 13-iinnarnik ukioqarlutik angajoqqaatik qimallugit 1.400 kilometerisut isortartutigisumut aallarlutik 8. Klasseriartaraluarput, maanali tamanna unippoq. Una ukioq atuarfiusoq aggusti aallarnerfigalugu Ittoqqortoormiini  perngaamik 8. Klassertoqarpoq taakkulu meeqqat atuarfiat najugartik qimannagu naammassissallutik.

Atuartut taama ukiukitsigalutik aallarlutik atuariartortarnerat sunniuteqarnerluttartoq ilaatigut angerlarsernernik, atuarfiup pisortaa oqarpoq.

- Una siusinnerusukkut 7 klassiinnarmut killillutik, 8 klassinngoraangamik Nuummut atuariartortalutik, taava tassani atuarfiup ingerlarnga atuartunut annertuumik sunniuteqartarpoq.

- Atuartitsinerup unamminarunnaartutut isikkoqalernera, piumassuseerukkiaartuaartarneq. Kisianni angajoqqaat atuarfiup sinniisai suleqatigalugit namminneerlutik anguniarnikuuaat meeqqami najugartik qimannagu maani naammassisinnaalernissaat.