Isumaqatigiissut nutaaq: Saarulliup minnerpaaffissaa allivoq akikinnerulerlunilu

Royal Greenlandimut tunisinermi saarulliup minnerpaaffissaa allissaaq aalisartullu tulaassaminnit kaasarfimmiussakinnerulissallutik.

Tamanna KNAPK-p Royal Greenlandillu sapaatit akunnerani kingullermi isumaqatigiissutigaat.

Saarullik niaqulik 75 oorimik niaqoqanngitsorlu koruunimik ataatsimik akikillissapput.

- Saarullik niaqulik kilomut 6 koruunit 50 ooreqartoq 5 koruunit 75 ooreqalissaaq, KNAPK Facebookkikkut allappoq, nangillunilu:

- Niaqoqanngitsorlu 9 koruuneqartoq 8 koruuneqalissalluni.

AAMMA ATUARUK Aalisartunut ikiorsiissutit misissorneqartut

KNAPK-p siulittaasua, Henrik Sandgreen isumaqatigiissut naammagisimaarnagu KNR-imut oqaluttuarpoq.

- Tamanna aalisartut tunisinerminni aningarsiakinnerulernerannik kinguneqassaaq.

Akit nutaat Royal Greenlandip tunisassiorfiini tallimanngorpat juulip 17-anniit atuutilissapput.

45 cm

Royal Greenlandip tunisassiorfiinut tunisinermi saarulliup minnerpaaffissaa aamma allanngortinneqarpoq. Tamanna ippassaq ataasinngornermi juulip 13-ani atuutilerpoq.

Saarulliup niaqullip angissussaa minnerpaaq 40 centimeterimiit 45 centimeterinngorpoq.

Tamanna saarulliit mikinerit tunitsivissaqannginnerinik peqquteqartoq, KNAPK allappoq.

Arctic Prime Fisheries kujataani tunisassiorfiani saarulliup minnerpaaffissaa 60 centimeteriusoq KNR-imiit siusinnerusukkut oqaluttuaraarput.

Taannali maanna aamma 45 centimeterinngortinneqartoq KNAPK allappoq.