Danmark Isumaqatigiinniarnerit naammassiartulerput
![](/sites/default/files/styles/image_934x467/public/article_images/forligsinstitution.jpg?itok=ysvD4QU3)
Danmarkimi suliumajunnaarnersuaqarsinnaanera suliartoqqusiunnaartoqarsinnaaneralu isumaqatigiinniarfiusuni marlunni taamaatinneqarpoq. Isumaqatigiissitsiniartartummi qitiusumik allattoqarfianni sapaatit akunnerini kingullerni isumaqatigiinniartoqareersoq kommuninut nunallu ilaannut isumaqatigiissuteqartoqarpoq.
AAMMA ATUARUK Isumaqatigiinniarnerit atorlugit timmisartuussinerit qulakkeerneqassapput
Naalagaaffiulli suliffeqarfiutaani sulisunut suli isumaqatigiissuteqartoqanngilaq. Ilaatigut DMI-mi sulisut taakkununnga ilaapput, isumaqatigiittoqarsinnaassanngippallu tamanna nunatsinni timmisartuussinermut sunniuteqarsinnaavoq.
DMI inatsisitigut pisussaaffik malillugu mittarfinnut silamik ilimasaaruteqarnissamut kisimiilluni Danmarkimi Angallannermut Aqutsisoqarfimmit akuerisaavoq.
Suliumajunnaartoqassappat suliartoqqusiunnaartoqassappallu nunatta iluani timmisartuussinerit sunnerneqannginniassammata, Kangerlussuarmi silasiortut pingasut suliumajunnaaqataannginnissaat isumaqatigiinniarnerup ingerlanerani isumaqatigiissuteqartoqarpoq.
AAMMA ATUARUK Nunatsinni silasiortut suliumajunnaaqataassanngitsut
Danmarkimili Savalimmiunilu mittarfinnut silamik ilimasaaruteqartitsiinnarnissamik isumaqatigiissuteqartoqanngimmat, imarpik qulaallugu timmisartuussinerit sunnertissinnaasut, angallannermut kattuffimmi siulittaasoq, Bolette Brødsgaard KNR-imut siusinnerusukkut oqarpoq.
Isumaqatigiissitsiniartartut qitiusumik allattoqarfianni isumaqatigiissuteqarnissamut piffissaliussaq maajip aallaqqaataanut killeqarpoq.
Kingusinnerpaamik maajip aallaqqaataani isumaqatigiissuteqartoqarsimanngippat, nunatsinni annaassiarnerit akerleriissuteqarnermit sunnerneqassanngillat, soorlu aamma nunatsinniit Danmarkimut napparsimasunik angallassinerit attatiinnarneqassasut.