Nunatsinni silasiortut suliumajunnaaqataassanngitsut
Taamaalilluni Danamrkimi suliumajunnaarnersuaqaraluarpalluunniit nunatsinni timmisartuussinerit ingerlannassapput. Nunattali Danmarkillu akornanni timmisartuussinissat kinguaattoortarsinnnapput.
Danmarkimi Angallannermut Kattuffiup aamma Centralorganisationen af 2010-p (CO10) tamanna KNR-imut uppernarsarpaat, taakku DMI-mi sulisut ilaasa sulineq pillugu akerleriiinnermi ilaannginnissaannik isumaqatigiissutigaat.
Isumaqatigiissut naapertorlugu Danmarkimi pisortat suliffeqarfiini DMI ilanngullugu sulisut suliumajunnaaraluarpataluunniit silasiortut pingasut Kangerlussuarmi sulisuusut nunatsinni mittarfinnut silassamik ilimasaaruteqariartorlutik suliartortassapput.
Angallannermut kattuffimmi siulittaasoq, Bolette Brødsgaard KNR-imut oqarpoq:
- Isumaqatigiissummi silasiortut pingasut, Kangerlussuarmi sulisut ilaapput. Silasiortut maajip aallaqqaataaniit sisamaalissapput – taakku Kalaallit Nunaanni timmisartuussinermi silamik ilimasaarinisaqq isumagisaqaraat, taamaammat suliumajunaarnermi ilaassanngillat, Angallannermut Kattuffiup siulittaasua oqarpoq.
- Kalaallit Nunaanni timmisartuussineq sunnerneqassanngilaq. Danmarkimi akerleriinnermit eqqorneqassanngilaq.
AAMMA ATUARUK Isumaqatigiinniarnerit atorlugit timmisartuussinerit qulakkeerneqassapput
Danmarkimut timmisartuussinerit kinguaattuussasut
Isumaqatigiissitsiniartartoqarfiup suliumajunnaarniarnissat ullunik 14-iugallartunik kinguartippaat, maannalu apriilip 22-anit aallartissasoq kalerriutigineqarluni.
Maanna isumaqatigiissuteqanngikkaluarpat DMI-mi sulisut suliumajunnaarnerat pissutigalugu nunatsinni timmisartuussinerit unitsinneqartussaassagaluarput.
Danmarkimimi Angallannermut Aqutsisoqarfiup DMI mittarfinnut ilimasaaruteqartussatut kisiartaatillugu akuerisaraa. Timmisartuutileqatigiiffinniillu timmisartut ornigassaannut silassap ilisimasaarutigineqaqqaarnissaa inatsisitigut aaliagigaavoq. Timmisartorlu qangattaraangat mittarfiit marluk navianartorsiulernissami miffissatut pilersaarutaasussaallutik.
AAMMA ATUARUK Danmarkimi suliumajunnaartoqassappat nunatsinni timmisartuussinerit eqqorneqarsinnaapput
Sulisulli ilaasa suliumajunnaarnermi ilaannginnissaannik isumaqatigiissuteqarneq nunatsinnut kisimi atuupput Savalimmiunilu mittarfimmut Várgamut danskillu mittarfiinut atuunnani. Atlantikoq qulaallugu timmisartuussinissat akerleriissuteqarnermit eqqugaanissaat ilimanaateqarluarpoq.
- Kalaallit Nunaannit Kastruppimut timmisartuussinissat sunnerneqarsinnaapput. Billundimi mittarfik matumani aamma ilaavoq, taanna aamma sunnerneqarsinnaavoq, pingaartumik kinguaattoornernik immaqalu ataasiakkaat taamaatiinnarneratigut. Sulili maannamut nalunarpoq, Bolette Brødsgaard oqarpoq.
Nunatsinni annaassiarnerit akerleriissuteqarnermit sunnerneqassanngillat, soorlu aamma nunatsinniit Danmarkimut napparsimasunik angallassinerit attatiinnarneqassasut.
AAMMA ATUARUK Flypassagerer risikerer ændrede billetter
Aamma anorsarinnissaanik, anorersuarnissaanik, ulussaarsuarnissaanik piterarnissaanik ilimasaaruteqartarneq, tavalu imartani silap qanoq innissaanik ilimasaarutit sikorsuarnillu alatsinaannerit ingerlaannasallutik.
Isumaqatigiissitsiniartartoqarfik isumaqatigiinniarnissamut nutaamut sapaatip akunnerani matumani aggersaavoq. Illuatungeriit apriilip 22-aatinnagu isumaqatigiissinnaanngippata, isumaqatigiissitsiniartartup, Mette Christensenip suliumajunnaarniarneq ullunik 14-inik kinguarteqqissinnaavaa.
