Assi: Camilla Dam/KNR

Namminersorlutik Oqartussat: Danmarkimi suliumajunnaartoqassappat nunatsinni timmisartuussinerit eqqorneqarsinnaapput

Danmarkimi pisortat suliffeqarfiini apriilip ulluisa sisamanni suliumajunnaartoqalissagaluarpat, soorlu tamanna siusinnerusukkut aarlerisaarutigineqareersoq, tamanna Air Greenlandip timmisartuussineranut eqquinerlussaaq. Attaveqaqatigiinnermut naalakkersuisoqarfik KNR-imut taama ilisimatitsivoq.

- Naalagaaffik isumaqatiginninniarnerni aaqqiissutissamik nassaanngippat, tamanna Danmarkimi silasiortunut DMI-meersunut ilaannakortumik eqquissaaq, Kalaallit Nunaannullu tamanna assigiinngitsorpassuartigut eqquissaaq, Attaveqaqatigiinnermut naalakkersuisoqarfimmi pisortaq Ruth Lindhardt, KNR-imut mailikkut allakkamini ilaatigut taama oqarpoq.

Timmisartoq Kalaallit Nunaannukartussaq qangattarpat, tikitassamilu silassamik nalunaarummik sukumiisumik tigusaqarsimanngikkuni, taava timmisartortitseqatigiiffiup mittarfissat allat marluk periarfissatut timmisartortartunut inatsisit naapertorlugit nalunaarutigisussaatitaavaat. Danmarkimili suliumajunnaartoqalissagaluarpat DMI silassamik Kalaallit Nunaanni mittarfinnut tamanut nalunaarusiorsinnaanngilaq, taamaassappallu timmisartut Kalaallit Nunaannukartinneqarsinnaassanatik.

- Silaannakkut angallanneq Kalaallit Nunaanni taava unitsivinneqassaaq, Air Greenlandimmi inatsisitigut pisussaaffini naammassisinnaassanngimmagit, Attaveqaqatigiinnermut naalakkersuisoqarfiup pisortaa Ruth Lindhardt oqarpoq.

Air Greenlandip timmisartorsua Airbus suli Københavnimit Kangerlussualiarsinnaassaaq. DMI-lli Kangerlussuarmut silamik ilimasaarutit aamma akisussaaffigai, Namminersorlutik Oqartussat taama nalunaaruteqarput.

Namminersorlutik Oqartussat ajornartorsiut Naalagaaffimmut ilisimatitsissutigereerpaat, isumaqatiginninniarnernilu inerneriumaartussat utaqqillugit.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat