Isumaginninnermi siunnersortit aqagu akerliussutsimik takutitsiniarunnaartut

Isumaginninnermi siunnersortit nunatsinni sumiiffinni arlalinni aqagu akerliussutsimik takutitsiniaraluarput.

Isumaginninnermummi siunnersortit akissarsiaminnit tapimik annaasaqartussanngornertik – taamaalillutillu qaammammut 3.500 koruuninik akissarsiakinnerulernissartik kamaatigaat.

Isumaginninnermi siunnersortit peqatigiiffiat, Niisip tusagassiuutinut nalunaarummi sapaatiummat allappoq.

Taakkuli isumaat maanna allanngorpoq. Akerliussutsimimmi takutitsiniarunnaarlutik ualeq manna – akerliussutsimik takutitsiniarnermut ulloq sioqqullugu mailikkut naatsumik nalunaarutigaat.

- Ilaasortagut AK-mit ilisimatinneqarput oqartussaanermut tapigitinneqartoq peerneqanngiinnassasoq paasissutissiiffigineqarput, taamaammat akerliussutsimik takutitsinissamik ilimasaaruteqarput taamaatipparput, mailimi allassimavoq.

Naalakkersuisut Atorfillillu Kattuffiat (AK) isumaginninnermi siunnersortinut suliamillu isumaginnittunut isumaqatigiissutit maanna isumaqatigiinniutigileruttorpaat.

Dina Olsen AK-mi siulittaasoq, Sermitsiaq.ag-imut ima oqarpoq:

- Ajornerusumik inissittoqarnissaa siunertarineqannginngisaannarparput. Aamma taamaanngisaannarpugut, soorunami taamatut isumaqatiginninniartoqarneq ajorpoq, Dina Olsen ilisimatitsivoq.

Ilulissani, Aasianni, Sisimiuni, Maniitsumi, Nuummi Qaqortumilu aqagu akerliussutsimik takutitsisoqartussaagaluarpoq.