Issittup amarua nunatsinni immikkuullarissuusoq
Pinngortitaleriffimmi Københavns Universitetimilu Statens Naturhistoriske Museumimi ilisimatuutut allaatigisaata Amerikap avannaani nunatsinnilu amaqqut timaanni ujaluusat siuaasaannut paasissutissartallit aggorlugit misissueqqissaarfigaat.
- Kalaallit Nunaanni Umimmaat Nunaannilu amaqqut eqimattat amaqqunit allanit immikkuullarissuunerat ersarilluartoq uani takusinnaavarput, aamma amaqqunit Amerikap avannaani issittumi sumiiffinni siumugassaasunit.
Pinngortitaleriffimmi Københavns Universitetiamilu ilisimatooq pd.h-rlu, Mikkel Sinding taama oqarpoq.
Taassuma ilisimatuutut misissueqqissaarnermi issittumi amaqqut Amerikap avannaani issittumilu amaqqunit allanit ikinnerpaasut paasineqartoq oqaatigaa. Qanorli amerlatiginerat eqqorluartumik oqaatigisinnaanngilaa:
- Amaqqut 200-t missaanniittut ilimagikannersinnaavara, 500-nit ikinnerusut nalunarani.
Amaqqut ukiuni 29-ni eqqissisimatitaareersut piniarneqarsinnaaqqilernissaat Naalakkersuisut siorna isumaliutersuutigaat,
tamannalu piniartunit nuannaarutigineqarpoq, piniartarfigisaammi amaroqaraangat piniagassaat qimaasarnerat nalaattarpaat. Nunatsinni pinngortitaleriffiup amaqqup piniarneqalernissaat taamani mianersoqqussutigaat.
AAMMA ATUARUK Qimmit qimuttut nunarsuarmiunut kingornussat allattorsimaffiannut ilanngukkusukkaat
Mikkel Sindingip oqarnera naapertorlugit ilisimatuutut allaatigisaq Naalakkersuisut aalajangiinissaannut tunngavittut misilittakkaneersutut atorneqarsinnaavoq,
taamaalilluni susassaqarfik illersorneqarsinnaasumik qaammarsarneqarsimasumillu aqunneqarsinnaaniassammat:
- Ilisimaligarlu una atorlugu aamma amaqqut uku Umimmaat Nunaanniittunut qanigisariigaat takusinnaavaat, nunavissuarmiuunngillat amaqqullu uku ikittuinnaapput, taamaammat piniarnerat illersorneqarsinnaanerusumik aqunneqarsinnaassalluni, Sinding oqarpoq.
Suliniut Qimmeq kalaallit qimuttuinik misissuisoq amaqqunik suliniummut aningaasatigut tapersiivoq, misissuinerullu tulliattut, maani Issittumi amaqqut qimmillu qanoq akuleriissimatigineri maanna misissorneqassapput, Mikkel Sinding oqarpoq.
