Issittumi uumasut avannarparternerussasut
Issittumi silaannaap siunissami ilimagisamit sukkanerusumik kiatsikkiartulernissaa pinngortitallu allangoriartupiloornissaa ilimagisariaqartoq, issittumi siunnersuisoqatigiit nalunaarusiarititaat ukiut sisamat ingerlanerani suliarineqarsimasoq taama allaaserinnippoq. Nalunaarusiarlu danmarkimi tusagassiorfippaalussuit ullumi sammivaat.
Nalunaarusiaq taaguuserneqarsimavoq ”Issittumi kissatsikkiartornerup kingunissai”. Nalunaarusiaq taanna ilisimatuut 300-t 400-llu akornaniittut Issittumilu siunnersusioqatigiinnut Islandimi isumasioqatigiinnissaanni saqqummiunneqassaaq.
Isumasioqatigiinnermi aqagumiit tallimanngorneq ilanngullugu eqqartugassaat imaannaassagunanngeqaat.
Ilisimatuut nalunaarusiaminni allaaseraat issittumi uumasut avannarparternerussasut, ukiullu 100-t qaangiuppata nannut nungutaareersimassasut.
Nalunaarusiami ilisimatuunit aamma eqqoriarneqarpoq ukiut 2300-kut aallartisimalernerani
ernutaqqee-qqee-qqee-qqee-qqiutigut inunngorsimaaleriarpata, sermersuaq nungulluinnarsimassasoq, kalaallillu nunaat qorsuussasoq, soorlu Grønland taagutimini taamaattoq.
Ilisimatuulli nalunaarusiaanni issittumi allanngorarfiusaqisumi periarfissat allat takkutissanerarpaat, soorlu nunap iluanut qillerinikkut gasimik ujarlernissaq.
Ilisimatuut nalunaarusiartik aallavigalugu inerniliinngillat, issittulli nunaata naalakkersuisuinut iliusissanik eqqarsalereeqqullugit kajumissaaripput.
