Issittumi siunissami aalisarneq nalorninartoq

Imaq aasami kiannerusalermat kujasinnerusumi aalisakkat aasakkut avannarparterlutik tunumut kitaanullu apuuttalersinnaapput. Naalagaaffiit Peqatigiit silap pissusia pillugu ataatsimiititaliaat IPCC imarpissuarnut nunarsuarmilu sermeqarfiit tamaasa pillugit nalunaarusiamini nutaami taama allappoq.

Silallu pissusiata allanngoriartorneranik peqquteqartumik aalisakkat allat imartatsinnut takkussuutilereersimasut, Pinngortitaleriffimmi aalisakkat qaleruallillu pillugit immikkoortortaqarfimmi ilisimatooq Teunis Jansen oqarpoq.

- Avaleraasartuut tunillu Tunumut ukiut qulit kingulliit ingerlanerini takkussuunnikuupput. Soorlu aamma Tunumi ammassaat. Tamanna nutaarsiassaanngikkaluarpoq, Kalaallit Nunaatali imaaniinnerulernikuupput, Teunis Jansen oqarpoq.

AAMMA ATUARUK Tunumi avaleraasartuut tunfiskeqalersitsipput

Ilanngullugu oqaatigaa, niuernikkut iluanaarutaasartut avaleraasartuut tunillu siunissami takkuttualersussaassagunartut. Taakkuali siaruaaffii nunatta imartaanut killeqqalaarmata takkuttarlutillu qimaguttarnissaat ukiuni qulikkaani siullerni naatsorsuutigineqartariaqartoq ilisimatooq oqarpoq. Ingerlaartarfiimi Tunumi taamaallaat aasakkut qanoq kiatsigineranit sunnerneqarneq ajorput.

- Tamanna 2015-imi misigereerparput. Ukiormannalu ingasanneruvoq, avaleraasartuukeqaluni.

AAMMA ATUARUK Avaleraasartuut nunatta imartaaniittut ikittuaraannaasut

Immalli kianneruleriartorneratigut imartatsinni aalisakkanik allanik takukulanerulissasugut, ilisimatuup naatsorsuutigaa:

- Soorlu kapisillit qatigallit eqalussuillu qaamasut. Immaqa aamma avannarpasinnerusumi, soorlu Uummannap Qeqertarsuullu eqqaani saarulliit. Aammalu qeeraasat aamma saarulliusat avaleraasakkaat eqqaaneqarsinnaapput, Teunis Jansen oqarpoq.

Aalisakkalli maanna naammattuugaasartut pissusissamisoortumik allanngoriartornerit imartallu kianneruleriartorneri ataqatigiinnerisut takkuttalertuunersut, ukiuni arlalinni misissuinikkut aatsaat qularnaagassaasoq, Teunis Jansen oqarpoq.

AAMMA ATUARUK Qaqortumi aalisartoq: Isumaqaraluaratta kalaallit eqalussuarigaat

Issittumi siunissami aalisarneq nalorninartorpassuaqartoq IPCC-p nalunaarusiaani allaqqavoq.

Aamma imaanngilaq aalisakkat assigiinngiiaartut amerlimmata aalisarneq pitsaanerulissasoq. Aalisakkat siaruaaffiini nikerarujussuarneq aalisarnermut aammalu nunatta karsianut allanngorartuunngitsumik aalisarnermik pisariaqartitsisumut akornutaavoq.

Teunis Jansenip Tunumi ammassaat assersuutigai.

- Immap kiannerulernera ilutigalugu nikeriarmata, ammassaat pillugit nutaamik isumaqatigiissuteqartoqarpoq. Kalaallit Nunaat pisassiissuteqarnerulerpoq, Island Norgelu pisassiissutikinnerulerlutik. Ammassaalli nikeriarnerat ilutigalugu ikileriarput. Ammassaat naammattumik angissuseqarlutik aalisarneqarsinnaasut maanna ikinnerupput. Tassalu maannatut inissisimasoqartillugu, Kalaallit Nunaat amerlanernik pisassinneqarpoq, pisassiissutigisinnaasalli ikinnerupput, Teunis Jansen oqarpoq, nangillunilu.

AAMMA ATUARUK Raajat tunisat amerleriarsimapput

- Aalisakkat iluanaarutaasinnaasut pingaarnerit, soorlu raajat, ernumasitsipput. Taakkumi itisuumiikkamik allanngornermit sunneruminaannerupput. raajalli avannarparternerussanersut, taama amerlatigisunik aalisaannarsinnaanersugut, aalisakkaniilluunniit allanit nutaanit inangerneqassanersut siulittorsinnaanngilarput,

Silap pissusia qanoq allanngoriartornersoq immallu seernassusaata aalisakkat nerisartagaasa amerlassusaannut nerisaasalu pitsaassusaannut sunniutai aalisakkat amerlassusaannut sunniuteqartut, Beringhavimi misissuinerit kingulliit paasinarsisikkaat Naalagaaffiit Peqatigiit nalunaarusiaanni allaqqavoq.

AAMMA ATUARUK Issittup imartaa aatsaat taama sikunngitsigivoq

Teunis Jansenilu aamma nassuiaavoq, kiatsikkiartornera pissutigalugu imaani uumasut assigiinngitsut allat Manerassuarmit Canada avannaatigoorlutik nunatta imartaanukarnissaat ilimanartoq. Aammalu tamanna nalorninartoqarpoq.

- Uumasut inunnit nunarsuarmi allamukaanneqartunik assersuutissarpassuaqarpoq. Uumasut nunarsuarmi allaneersut pinngortitami ataqatigiinnermut malunnartumik kissaatiginanngitsumillu sunniuteqarsinnaasarput, Teunis Jansen oqarpoq.

Taassuma aningaasaqarniinnaq pineqanngitsoq naggasiutigaa.

- Kalaallit Nunaanni pinngortitamut attaveqartorujussuuneq aamma eqqaamaneqartariaqarpoq. Maanna piniarneqartartut sinerissami piniartunit tunngavigineqartut sunnerneqassapput, taamaalillunilu nunaqarfinni inuunermut sunniuteqassalluni, Teunis Jansen oqarpoq.

AAMMA ATUARUK Silap allanngorneriartornera issittumi uumasunut kinguneqarnerlussinnaasoq