Qaqortumi aalisartoq: Isumaqaraluaratta kalaallit eqalussuarigaat
Aalisartut marluk pisarisartakkaminnit allaanerumaartunik sapaatip akunnerata ingerlanerani pisaqarput.
Nunattami imartaani qaqutikkut siumorneqartartut eqalussuit Qaqortumi Tasiilamilu pisarineqarput.
Aasallu ingerlanerani silap kiarujussuarneranit imartarput kiannerulerneranik eqalussuaqarnerulersimasinnaasoq imarmiunik uumasuusivimmi Den Blå Planetimi katersugaatinut akisussaasup Lars Olsenip peqquteqarnerarpaa.
- Assit nassiussasi takuinnarlugit eqalussuaq sildehajiusoq qularutiginngilara. Sigguisa noorittorujussuuneri kigutaallu inngiginnerisa taamaattuunerinut ersiutaapput, Lars Olsen KNR-imut oqarpoq.
Eqalussuit pisarineqartut Islandip avannaanukarneq ajoraluarput. Imarpissuup avannaatungaani Isalandip kujataatungaaniittuni qeqertaaqqani De Kanariske Øerip imartaaniittuulluni.
Ammassassuit avaleraasartuullu nerisarai
- Imartap kiannerulernera ilutigalugu Kalaallit Nunaannut apuussimasinnaavoq taavalu nerisarisaasa amerlisimaneri pissutaalluni. Sildehajip ammassassuit avaleraasartuullu nerisarai, nerisassaqarluarfiillu ornissinnaasarlugit, Lars Olsen oqarpoq.
Aalisartoq bundgarninik amuariarami eqalussuarmik taamaattumik pisaqarnissani ilimagisimanngikkaluarpaa.
-Tassami tupannarpoq. sunaanersoq nalugatsigu aamma siullermik, assullu oqimaalluni. Kisiat aalisaqatima ilisaraa eqalussuaasoq, Peter Motzfeldt oqarpoq.
-Siullermik isumaqaraluaratta kalaallit eqalussuarigaat. Taava qaqorpallaaqimmat assut eqqumiigalugu. Isumaqaraluaratta kalaallit eqalussuarigaat sunaaffa allaalaartoq.
Eqalussuaq Qaqortumi pisarineqartoq 250 kilonik oqimaassuseqarpoq, 2 meter 60 centimeterisullu takissuseqarluni. Taannalu pinngortitaleriffimmut misissugassanngorlugu nassiunneqarluni.
