Tunumi avaleraasartuut tunfiskeqalersitsipput
Taakku saniatigut aalisarnermik ilisimatuut avaleraasartoorniarnermi aalisakkanik piumaneqarluartunik aalisagarsuarnik avaleraasartuut ilaannik tunfiskinik qaqitsisoqassanersoq nakkutigeqqissaarpaat.
Tassami kilisaatip Danmarksstrædemi avaleraasartoorniartup tunfiskit angisuut pingasut tamarmik immikkut 100 kiilunik oqimaassusillit 2012-imi aggustimi qalorsuarmini ilanngullugit qaqippai.
Kalaallit Nunaata imartaani ukiuni 100-ni tunfiski siulleq
Taamaalilluni ukiut 100-t sinneqartut ingerlanerini Kalaallit Nunaata imartaani tunfiskimik siullermeerluni pisaqartoqarpoq. Tassami kingullermik pisarineqarsimasutut nalunaarutigineqartoq tassaagami tunfiski tungujortunik avaleraasartalik Qaqortup eqqaani ukioq 1900-mi pisarineqarsimasoq.
Kalaallit Nunaata imartaani tunfiskimik pisaqartoqarnera immat issittuniittut kissarneruleriartornerannut takussutissaalluartutut ilisimatuut oqaatigaat.
Aamma tunfiskit avaleraasartuunik mamarisaqarluartuummata, avaleraasartuut ingerlaarnerisa immallu kissarnerulernerata kingunerinik Kalaallit Nunaata eqqaani tunfiskit amerlanerulernerannik kinguneqarsinnaasoq, professor Brian Mackenzie DTU Aqua-meersoq oqarpoq. Tamatumunngalu ilanngullugu oqaatigalugu, Norge aamma Island tamarmik immikkut tunfiskinik 30 tonsinik ukiormanna pisassinneqarsimammata.
Tunfiskit issittup imartaani
Tunfiskit nalinginnaasumik Mexicop Kangerliumanersuani Immallu Akullersuup kippasinnerusortaani uumasuupput, aasakkulli avannarpartertarlutik. Matumanili allaat issittup imartaanut avannarpartersimanerat nutaarsiassaavoq.
Tunfiski 450 kiilunik oqimaassuseqalersinnaavoq, aalisakkanillu tamanit piumaneqarnersaasarluni.
Soorlu tunfiski 342 kiilunik oqimaassusilik Nunarsuarmi aalisakkanik tuniniaaviit annersaanni Tokyomiittumi 2011-mi 2,2 millionit koruunilerlugu tunineqarpoq.
