Issittumi Atugarissaarnermik ilisimatusarfik ammarneqalersoq

Issittumi Atugarissaarnermik Ilisimatusarfik nutaaq oktobarip ulluisa 27-anni ammarneqassaaq.
Steven Arnfjordip, Issittumi Atugarissaarnermik ilisimatusarfik Tenna Jensen, Københavnip Universitetiani lektoriusoq, peqatigalugu, aqussavaa. Assi © : Ilisimatusarfik
Allattoq Mads Lynge
oktobarip 19-at 2021 10:54

Issittumi atugarissaarnermi pissutsit assigiinngitsut, soorlu inuuniarnikkut ajornartorsiutit, innarluuteqarneq, isumaginninnermut politikki, meeqqat atugaat, imminut toquttarnerup pinngitsoortinniarnissaanut suliniutit pissakinnerlu, Issittumi Atugarissaarnermik Ilisimatusarfimmi ilisimatusaatigineqarsinnaalissapput.

AAMMA ATUARUK Nunatsinni kommunit isumaginninnikkut suliassaannik danskit ikiuussinnaapput

Issittumilu atugarissaarnermut tunngasuni nunatsinni ilisimatusartoqarsinnaanngornera, immikkoortortaqarfimmi pisortap Steven Arnfjordip, sociologiusup, nuannaarutigaa:

- Atugarissaarnermut tunngasuni ilisimatusarfeqalerpugut. Kalaallit Nunaanni naalakkersuisoqarfinni assigiinngitsuni, kommunini aqutsiveqarfinnilu assigiinngitsuni paasisanik katersuivittaassaagut. Assersuutigalugu inuusuttut suliunnaarsimanerannut paasissutissat tunuliaqutaat, innarluutilit pisinnaatitaaffii pillugit paasissutissat, angerlarsimaffeqanngitsullu amerliartornerannut paasissutissat katersorsinnaalerpavut, Steven Arnfjord oqarpoq.

Ilisimatusarfimmik nutaamik pilersitsinissaq utaqqisimavaa

Issittumi atugarissaarneq pillugu ilisimatusarfimmik pilersitsisoqarnissaa taassuma piffissami sivisuumi utaqqisimavaa:

- Ilisimasat pillugit Ilisimatusarfimmut pissarsisoqarsinnaalissaaq, ilisimalikkallu pillugit inuiaqatigiinni avitseqatigiittoqarsinnaalissaaq, Steven Arnfjord ioqarpoq, nangillunilu:

- Siunnersortinik avataaneersunik maannamut atuingaatsiarsimavugut, aamma suli taamaaliortassaagut, kisianni ilisimalikkavut ataatsimut pigilissavagut, taakkualu aallaavigalugit ilinniartitsisinnaalissalluta, Steven Arnfjord oqarpoq.

AAMMA ATUARUK Nunatsinni kommunit isumaginninnikkut suliassaannik danskit ikiuussinnaapput

Immikkut ilisimasallit suleqatigiillutik ilisimatusarsinnaalissapput, soorlu aamma ilinniartut ilisimatusaatigalugu allaaserisaqarnerminni naapeqatigiissinnaalissallutik, suliffeqarfiillu Issittumi atugarissaarneq pillugu assigiinngitsutigut suleqatigiissinnaalissasut, Issittumi Atugarissaarnermik Ilisimatusarfimmi immikkoortortaqarfimmi pisortaq Steven Arnfjord taama oqarpoq.

Taassuma Tenna Jensen, Københavnip Universitetiani lektoriusoq peqatigalugu, Issittumi Atugarissaarnermik ilisimatusarfik aqussavaa.