Islandimi illoqarfiit ilaanni innuttaasut qimagutitinneqartut
Islandip kujasissortaani Reykjanesip qeqertaasaani nuna tallimanngornermi arlaleriarluni sajoreersorlu illoqarfimmi Grindavikimi innuttaasut qimagussortitaapput.
Lava Grindavik ataallugu nunap iluatigut ingerlaarpoq, anitsisoqaratarsinnaaneralu aarleqqutigineqarluni.
Pissutsit aqunneqarsinnaapput, Islandimili oqartussat oqarnerat naapertorlugu qaqqaq innermik anitsisartoq nakkutigineqarpoq. Nuna suli sajuttarpoq, lavalu illoqarfiup ataatigoortoq ernumatitsilluni.
Nordisk Vulkanologisk Centerimik, Reykjavikimiittumik, aqutsisup Rikke Pedersenip oqarnera naapertorlugu maanna pissutsit immikkuullaripput, naak naluneqanngikkaluartoq Islandimi qaqqat innermik anitsisaraluartut.
- Qaqqat ukiut pingasut kingulliit ingerlaneranni pingasoriarlutik anitsinikuugaluartut maanna pisut annerungaatsiarput, pissutsillu ilungersunartutut nalilerneqarsinnaapputt, Rikke Pedersen oqarpoq.
Qaqqap innermik anitseratarsinnaanerani pissutaalluni Islandimi illoqarfiit ilaanni innuttaasut ukiut kingulliit 50-it ingerlanerani siullerpaamik qimagussortitaapput.