Islandimi illoqarfiit pingaarnersaata eqqaani qaqqaq innermik anitsisoq
Islandimi illoqarfiit pingaarnersaata eqqaani qaqqaq innermik ippassaq ataasinngornermi ualikkut anitsivoq.
Islandimi silasiortut taama nalunaartut, nutaarsiassaqartitsiviit arlallit allapput.
- Qaqqaq innermik massakkorpiaq anitserujussuanngilaq, Islandimi silasiorfik Islands Meteorologiske Institutimeersoq Matthew Roberts Reutersimut oqarpoq.
Qaqqaq taanna innermik Islandimi ualikkut tallimanngoriartornerani, tassa nunatsinni ualikkut pingasunngoriartulernerani anitsilersimasoq, islandimiut aviisiisa ilaat The Reykjavik Grapevine allappoq.
Reykjavikip kujataata kangisissortaani qeqertaasami Reykjanesimi 30 kilometerit missaannik ungasitsigisumi Litli-Hrúturimi qaqqaq innermik anitsisoq pujuallattaarpoq.
Qaqqamit tassannga pujoq, silasiortut oqarnerat naapertorlugu, Islandip avannaata kitaata tungaanukaarpoq.
Nuna sajuppillattarumaartoq kiarujussuartorlu, The Reykjavik Grapevine aamma allappoq.
Islandimi qaqqat ilaata 2010-mi innermik anitsineranit qutsissumi arsakorujussuaqarnera peqqutaalluni Europap ilarujussuani timmisartuussinissat ilarpassui taamaatinneqarput.
Tassa timmisartuussinissat 10.000-likkuutaat taamanikkut taamaatinneqarput.
Islandimit qaqqat ilaata innermik ippassaq ataasinngornermi anitsinera timmisartuussinissanut qanoq sunniuteqartigissanersoq, Islandimit suli nalunaanngillat.
Islandimi illoqarfiit pingaarnersaata aamma eqqaani qaqqat allat, aappaa 2021-mi aappaalu 2022-mi, anitsimmata navianartorsiortitsingaatsiarnatillu timmisartuussinissanut sunniuteqangaanngitsut, nutaarsiassaqartitsivik AFP allappoq.