Islandimi innermik anitsineq angallannermik eqquinngilaq
![](/sites/default/files/styles/image_934x467/public/article_images/20220804-102510-l-1920x1277we.jpg?itok=L2kQIJRB)
Islandimi illoqarfiit pingaarnersaanniit Reykjavik -miit 25 kilometerinik ungasissusilimmiittumi qaqqaq ippassaq innermik anitsivoq, erseqqissaatigineqarporli biilit angallannerinut Islandimiluunniit assartuinermut akornusiinavianngitsoq.
Islandimi naalakkersuisut taama avammut nalunaarput.
Gassili aniasoq silaannarmut mingutsitsimmat inuit tamatuma eqqaaniinnginnissaat kaammattuutigineqarpoq.
Nunatta nalunaaqutaa naapertorlugu nalunaaqutaq 11.18 qaqqaq innermik anitsisoq Fagradalsfjall innermik anitsilluni aallartippoq, taannalu Islandimi illoqarfimmut Grindavíkimut ungasinngitsumiippoq.
Innerulli anitsinera nalilerneqarpoq, qaqqap qunnerata anitsineriinnaraa, ilaasa aamma Islandip anitsineranik taaniartagaat.
Tassalu imaappoq innermik anitsineq taama ittoq nalinginnaasumik qaarnernik arsakorpassuarnilluunniit silaannarmi mingutsitsilersunik pilersitsineq ajortoq Islandimi naalakkersuisut erseqqissaassutigaat.
Qaqqaq innermik anitsisoq, siorna qaqqamut innermik anitsisumut ungasinngilaq, taamanilu innermik anitsineq ukiup affaanik sivisussuseqarpoq.
Islandimi politiit silasiorfiup allaffeqarfia aammalu Islandip ilisimatusarfia suleqatigalugit upalungaarsimallutik sillimapput.