Italiami naalakkersuisut qaqqap anitsisartorsuup nalaanit qimagussuisinnaanissamut sillimasut
Inuit 10.000-likkuutaat Italiap kujasissortaani qaqqap anitsisartorsuup nalaanit qimagussorneqarsinnaanissaannut Italiami naalakkersuisut sillimapput. Innermik anitsisartorsuaq illoqarfissuarmit Napolimit 20 kilometerisut ungasitsigisumiippoq.
Tassani nuna qaammatit kingulliit ingerlaneranni sajuttaqattaareersorlu taama pisoqarpoq.
Qaqqap innermik anitsisartorsuup Campi Flegreip nalaani nuna qaammatip kingulliup ingerlanerani 1100-riarluni, sinnerlugilluunniit, sajussimavoq.
Sajunnerit sakkortunersaat Richterip nunap sajuttarneranik uuttuutaa naapertorlugu 4,2-mik sakkortussuseqarpoq. Tamaani nuna ukiut qulikkuutaat sisamat ingerlaneranni aatsaat taama sakkortutigisumik sajuppoq.
Campi Flegreip nalaani nunap assigiinngitsutigut pisoqarfiunera nunap qaavata qaffattarlunilu appartarneranik kinguneqartoq, immikkut ilisimasallit oqaatigaat.
Campi Flegreip innermik anitsilernissaannut ernummatissaqarunanngitsoq, qaqqat innermik anitsisartut pillugit immikkut ilisimasallit, vulkanologit, isumaqarput. Campi Flegreilli nalaani nuna qaammammut 1,5 centimeterinik qaffattarmat tamaani illut aseruatitilersinnaanerat ernummatigineqarpoq.
Pinartumik aatsaat pisoqarpat innuttaasut qimagussorneqarumaartut, innuttaasut illersorneqarnissaat pillugu Italiami ministerip Nello Musumecip oqaatigaa.