Innermik anitsisartoq Etna arsanik lavamillu aniatitserujussuartoq

Innermik anitsisartoq Etna marlunngornermi anitserujussuaraluartoq aarlerinanngitsoq, Italiami oqartussat oqarput.
Etnap marlunngornermi innermik anitsinera ernumananngilluinnartoq, Stefano Brancho oqarpoq. Assi © : Handout/AFP/Ritzau Scanpix
Allattoq Ritzau
februaarip 17-at 2021 13:31
Nutserisoq Jaaku Lyberth, Naja-Vivi Mikaelsen

Nunarsuarmi qaqqani innermik anitsinerpaasartut ilaat Etna Italiamiittoq putsumik arsanillu marlunngormalli aniatitserujussuarpoq.

Innermik anitsisup assingi takuinnarlugit annilaarnarput. Tamannali illoqarfinnut Etnap qanittuaniittunut ulorianartorsiortitsinngitsoq, oqartussat oqarput.

- Sakkortunerujussuarmik anitsisunik takunninnikuuvugut, nunap sananeqaataanik qaqqallu innermik anitsisarnerannik misissuisarfiup pisortaa Stefano Brancho italiamiut nutaarsiassaqartitsiviannut AGI-mut oqarpoq.

Etna 3324 meteritut portutigisoq Europami qaqqani innermik anitsisartuni anitsikkajunnerpaavoq. Taanna Italiami illoqarfiup Cataniap qanittuani qeqertat ilaanni Siciliamiippoq.

AAMMA ATUARUK Innermik anitsisartup qaarnerani inuit qulit ajoqusertut

Etnap marlunngornermi innermik anitsinera ernumananngilluinnartoq, Stefano Brancho oqarpoq.

Qaqqalli anitsineranit qullaasut soorlu arsat ujaraaqqallu nakkaammata, Cataniami mittarfik oqartussat matuaat.

Etnap qanittuani nunaqarfinni Linguaglossami, Fornazzomi Milomilu pisut alaatsinaanneqartut, upalungaarsimasut inoqatinut attaveqaammi Twitterimi allapput.

Qaqqap anitsineranit qullaasut soorlu putsut arsakullu taavalu lava kuuttoq assini erserput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk