Innermik anitsisartup qaarnerani inuit qulit ajoqusertut
Innermik anitsisartup qaarneratigut innermik anitsisartumik ilisimatuut takornariallu aalamik ujaqqanillu eqqorneqariartaarput. DR.dk taama allaaserisaqarpoq.
- Lava apummut anngummat kissartup nillertullu naapinnerisigut qaartoqarneratut ippoq, Pippo Mazzagilia, Mount Etnamut takornarianik angallassisartoq taama oqaluttuarpoq.
Italiami nutaarsiassaqartitsivik ANSA naapertorlugu, inuit qulit ajoqusersimapput, taakkunanngalu arfinillit niaqqumikkut annertunngitsumik ajoqusersimanertik pissutigalugu napparsimmavimmut unitsinneqarsimallutik.
- Qujanartumik ujaqqanik anginngitsunik eqqorneqaramik inuit kimillanneqaannarput, Pippo Mazzagilia taama oqarpoq.
Innermik anitsisartoq Etna 2013-ip kingorna pingajussaanik anitsivoq. Kingullermik 2015-imi, taamani arsakunik lavamillu aniatitai kilometerimik ataatsimik qutsitsigisumut teqqalapput.