Isiginnaartitsisartut angallammik angalanertik unitsiaaraat

Nunatsinni illoqarfinni nunaqarfinnilu assigiinngitsuni innuttaasut Nunatta Isiginnaartitsisarfiani isiginnaartitsisartunit aasap ingerlanerani tikinneqarnissaminnut qilanaarsimassapput. 

Naatsorsuutigeriinngisamilli aningaasartuutit pissutigalugit angallammik angalalluni pilersaarutaasumik isiginnaartitsiartorfissaagaluit ikilisinneqangaatsiarput.

- Ingerlalluarnikooqaaq, maajip 24-aniit aallartikkami ulloq manna tikillugu angusarissaarnikuupput, aningaasassaaleqinerli pissutigalugu angalaneq unitsiaartariaqlerparput, Nunatta Isiginnaartitsisarfiani aqutsisoq pisortallu tullersortaa, Karl Villiam Jeremiassen oqarpoq.   

Qaanaamiit Nanortalimmut isiginnaartitsiartorfineqarnissaat Nunatta Isiginnaartitsisarfiata pilersaarutigeqqaaraluarpaa.  

Oquk aningaasartuuteqarfiungaatsiartoq

Sumiiffiit minnerusut tikinneqajuitsut isiginnaartitsisartunit tikinneqartussaagaluarput, taamaattoqanngilarli. Tamanna ilaatigut isiginnaartitsisarfiup sumiiffigisaani ajornartorsiortoqangaatsiarneranik pissuteqarpoq.  

- Illorsuup oqoqalerneratigut saniatigut aamma aningaasartuuteqarpugut. Taassuma saniatigut aningaasaateqarfinnut qinnuteqaatit ilaasa iluatsinngitsoornerat angalanerup tamaanga kipiinnartariaqarneranut pisooqataapput, Karl Villiam Jeremiassen oqarpoq.

Pilersaarutit malillugit isiginnaartitsisartut angalaqatigiit assigiinngitsut marluk sisamariarlutik angalasussaagaluarput. Angalaqatigiit siulliit tassaallutik isiginnaartitsisartutut ilinniagallit pingasoriarlutik angalasussat, tulliilu tassaallutik isiginnaartitsisartunngorniat ataasiarlutik angalasussat.  

Isiginnaartitsisartut angalasut siulliit takornarianik angallassissutaasartoq Kisaq angallatigalugu Nuummiit maajip 24-ni aallarput. Assi © : Grønlands Nationalteater

Aningaasassaaleqinerli pissutigalugu angalanissat marluk piviusunngortinneqanngitsoorput, taamaalilluni angalaqatigiit tamarmik ataasiaannarlutik isiginnaartitsiartorlutik angalallutik.

- Illorsuup oqoqalernera marsimili paasigatsigu qimapparput aningaasartuuteqangaatsiarlutalu. Isiginnaartitsisartunngorniarfik allaffeqarfillu ininut attartukkatsinnut nuuppagut, taamaattumik nutsernerit assigisaallu annertoorujussuarmik aningaasartuutigaagut, Karl Villiam Jeremiassen oqarpoq.

Isiginnaartitsisarfik marsimiilli qaammammut 150.000 koruuninik inimut attartukkamut akiliisarpoq, taassumalu saniatigut Nuummi Industrivejimi ininut attartukkanut atuinermut akiliuteqartarluni. Taakkulu aningaasat ukioq manna angalalluni isiginnaartitsiartoqattaarnernut atorneqarsimasinnaagaluarput.    

Nunatta Isiginnaartitsisarfiata sinerissami illoqarfinni nunaqarfinnilu 30-ni isiginnaartitsinissat naatsorsuutigigaluarpaa, nalaanneqartulli pissutigalugit sumiiffiit affaanngitsulluunniit isiginnaartitsiartorfigineqarput.

Isiginnaartitsisartut juulip aallaqqaataaniit juulip 18-iata tungaanut angalanissaat pilersaarutigineqaraluarpoq, angalallunili isiginnaartitsineq kingulleq juunip 17-i isiginnaartitsissutigineqarpoq.  

Isiginnaariartoqarluartoq

Suulli tamarmik ajortuinnaanngillat. Isiginnaagassiammi takutinneqartut nuannarineqarluarput.

- Angalanerput assut soqutigineqarluarpoq, isiginnaartitsinerillu ingerlalluarput, taavalu isiginnaariarluarneqarluni inuillu nuannisarlutillu pipput.

Angalanermi kingullermi isiginnaartitsisartut ilaat napparsimalerput, piareersaataareeraluartuniillu allaanerusumik aaqqiisariaqarlutik. Taamaattumik Aasianni Qeqertarsuarmilu isiginnaartitsinissaagaluit suleqatigiilluni workshoppertitsinermik taallugu aaqqissuisoqarpoq.

Itillimi meeqqat inuusuttullu workshoppertinneqarput. Assi © : Grønlands Nationalteater

Illoqarfinni nunaqarfinnilu assigiinngitsuni isiginnaartitsinissanut isiginnaariarnissat kommuninit aaqqissuunneqarput, innuttaasullu isiginnaariartartut amerlapput.

- Isiginnaartitsisartut angalanerat nuannarineqarluarsimavoq. Illoqarfinni nunaqarfinnilu tikitatsinniit innuttaasut nuannisarluarsimanerarlutik nalunaartarput.   

Isiginnaartitsiartoqattaarneq soqutigineqarluarmat pilersaarutaareersut sinnerisa aappaagu piviusunngortinneqarnissaat Karl Villiam Jeremiassenip neriorsuerusunngikkaluarluni neriuutigaa.

Angalanerit marluk piviusunngortinneqartut sivisussusaat allallu aaqqitassaasinnaasut pillugit Nunatta Isiginnaartitsisarfia isiginnaartitsiartoqattaarnermilu angalaqataasut ataatsimoorlutik piffissami aggersumi nalilersueqatigiissutigissavaat.