Nunatta Isiginnaartitsisarfia oquk pissutigalugu matuneqaqqippoq

Sulisut suliallu assigiinngitsut tamarmik Nunatta Isiginnaartitsisarfiata illorsuanut Nuummi Industrivejimut novembarimi utermata, pisortaat qungujulaqaaq. 

Ukioq kingulleq aasakkut oqoqarnera paasineqarmat illorsuaq suliarineqarlunilu iluarsortuunneqarpoq.

Uternerannit qaammatit sisamaannaat qaangiummata oquk ajornartorsiutaaqqilerpoq. Taamaammallu isiginnartitsisarfik matuneqaqqittariaqalersoq, pisortaa Vivi Sørensen oqaluttuarpoq. 

- Nutsernikuuvugut Industrivejiminngaanniit oquk qaammaterpaalunni malugileqqikkatsigu, tamatta assigiinngitsunik symptomeqarralluta. Taava misissortinnikuuarput ilumut oqoqaleqqissimanersoq, taaava paasinarsimmat oqoqaleqqissimasoq sulisut tamaasa anisikkallarnikuuagut allanillu sumiffigisinnaasatsinnik nassaartorluta, taanna oqarpoq. 

Ajornartorsiut aaqqinniarlugu sanaartortut ulluni arlalinni sulereerput, isiginnaartitsisarfiulli pisortaata qanoq sivisutigisumik matoqqanissartik ilisimanngikkallarpaa. 

- Nalugallarparput qanoq oqutsiginersoq, kisianni nassaartaqattaaleqqagatta assigiinngitsunik massakkut orniginartinngikkallarparput uternissarput. 

Isiginnaartitsisarfeqanngitsoq

Ukioq kingulleq juunimi Vivi Sørensen isiginnaartitsisarfimmi pisortanngorpoq, oqummillu ajornartorsiuteqarnertik atorfeqarnermini ukiumi siullermi naalliunnaraa.

- Misigisimavunga allanngortikkusutakka suli takutinnagit, inuuniapiloorneq massakkut atuuttaqattaarmat, taanna oqarpoq. 

Oqummillu ajornartorsiuteqaleqqinnerup isiginnaartitsisarfimmi sulinermut isiginnaartitsisartunullu akorngutaannginnissaa taassuma neriuutigaa. 

- Sapaatip akunnerata tulliani isiginnaagassiamik sungiusarluta aallartissaagut, taava aamma sapaatit akunneri marluk qaangiuppata isiginnaagassiaq alla sungiusalertussaavarput. Neriuppunga taakkununnga sunniuteqassanngitsoq aamma sulisisitsisuuvugut isiginnaartitsisartunut kiisamilu isiginnaartitsisartut sulisilerpagut. Oquk pissutigalugu ukioq manna iluamik isiginnaagassiornikuunnginnatta suli.

Upernaallu ingerlanerani isiginnaagassiassaqarnissaa suli neriunartoqarpoq. 

Nunatta Isiginnaartitsisarfianeersut maajimiit imaatigut angalaarlutik Qaanaamiit kitaata sineriaa angallavigalugu isigininnaartitsisaqattaassapput. Tamatumalu iluatsinnissaa isiginnaartitsisarfiup pisortaata naatsorsuutigaa. 

- Qujanartumik taanna isiginnaartitsisarfeqarnissamik piumasaqaatitaqannginnami isiginnaartitsisarfik Industrivejimiittoq oqukkalartoq nunatsinni angalasinnaanerput neriuutigivarput, Vivi Sørensen oqarpoq.